Interpoli serb arreston shqiptarin e shpallur në kërkim ndërkombëtar

Arrestohet biznesmeni Astrit (Nimani) Limani, i njohur ndryshe si Titi i Ukës. Burime nga Drejtoria e Policisë së Qarkut të Lezhës bënë me dije se, 41-vjeçari u prangos dje nga Interpol Serbia në pikën e kalimit kufitar Merdarë në kufirin kosovaro-serb. Mësohet se Limani ishte shpallur në kërkim ndërkombëtar, pasi ishte dënuar nga Gjykata e Milanos me 15 vjet burg në mungesë për organizim e trafik ndërkombëtar lëndësh narkotike dhe evazion fiskal.

Pavarësisht kërkimeve nga Interpoli, ai qëndronte lirisht në Shqipëri ku zhvillonte aktivitetin e tij si biznesmen, pronar i një kompleksi turistik të njohur në bregdetin e Shëngjinit. Policia e Lezhës pas informacioneve të marra nga Interpoli bëri identifikimin dhe lokalizimin e tij dhe të enjten bëri shpalljen në kërkim të 41-vjeçarit.

Ndërkohë, burimet e mësipërme sqarojnë se Astrit Limani është larguar nga vendi ynë 8-9 orë para se të shpallej në kërkim nga blutë e Lezhës, duke u larguar fillimisht në drejtim të Kosovës. Nga verifikimi që është bërë në sistemin TIMS, 41-vjeçari ka kaluar kufirin në doganën e Morinës në orën 9:00 të së enjtes.

Arrestimi i tij është bërë i mundur ditën e djeshme në doganën e Merdarës nga Interpoli serb. Pritet që policia serbe të ekstradojë Limanin drejt Shqipërisë dhe pas kryerjes së procedurave ai do të ekstradohet drejt Italisë.

Limani është një biznesmen i njohur në zonën e Lezhës, madje ka financuar edhe fushatat elektorale të disa forcave politike.