Ian Cliff mbështet ndryshimin e pronësisë së Trepçës

Ambasadori i Britanisë së Madhe në Kosovë, Ian Cliff, po e përkrah idenë e Qeverisë së Kosovës për ndryshimin e pronësisë së gjigantit metalurgjik “Trepça”. Aktualisht minierat janë të evidentuara dhe trajtuara si Ndërmarrje Shoqërore (NSH), e të cilat menaxhohen nga Agjencia Kosovare e Privatizimit (AKP).

Por, me ndryshimin e Ligjit për Ndërmarrjet Publike, po kërkohet që “Trepça” të kalojë në menaxhim të Ministrisë së Zhvillimit Ekonomik (MZHE).

Në një prononcim për gazetën “Zëri” ambasadori anglez vlerëson se pasuritë e Trepçës janë jetike për të ardhmen ekonomike të Kosovës, dhe sipas tij, nën menaxhimin e MZHE-së, do të jetë më e lehtë edhe për investitorët potencialë.