Hyrje ilegale nga Serbia nëpër rrugë dytësore, ndalohen dy persona në Kamenicë

Kamenicë – Njësitet policore kanë ndaluar një automjet me targa të huaja që kishte hyrë në territorin e Republikës së Kosovës përmes rrugëve dytësore, duke shmangur vendkalimet zyrtare kufitare me Serbinë.

Automjeti drejtohej nga një i dyshuar mashkull, shtetas i Serbisë, i cili shoqërohej nga një pasagjer mashkull. Sipas njoftimit policor, të dy personat dyshohet se kanë kaluar kufirin në mënyrë të paautorizuar.

Gjatë kontrollit të automjetit, policia ka gjetur të ngarkuara katër fellne automjeti së bashku me goma, për të cilat të dyshuarit nuk posedonin dokumentacion mbi prejardhjen e mallit. Malli i sekuestruar është dorëzuar në terminalin doganor për procedura të mëtejshme doganore.

Lidhur me rastin, është iniciuar procedurë për kundërvajtje për kalim ilegal të kufirit. Pas intervistimit dhe në konsultim me prokurorin kompetent, të dyshuarit janë liruar në procedurë të rregullt njoftoi policia e Kosovës./rajonipress/