Hoxhaj kritikon ashpër Qeverinë Kurti, për qasjen e saj në marrëdhëniet me SHBA-në

Ish-ministri i Jashtëm i Kosovës dhe aktualisht deputet i PDK-së dhe nënkryetar i Kuvendit, Enver Hoxhaj, ka kritikuar ashpër Qeverinë Kurti për qasjen e saj në marrëdhëniet ndërkombëtare, veçanërisht me Shtetet e Bashkuara të Amerikës.

Në një postim të tij në Facebook, Hoxhaj ka theksuar rëndësinë e thellimit të marrëdhënieve diplomatike të Kosovës me SHBA-në, në një kohë kur Serbia po dërgon delegacione për të forcuar lidhjet e saj në Washington, New York dhe Florida.

“Qeveria Kurti duhet ta kishte vizituar Washingtonin për të takuar administratën në formim të Presidentit Trump dhe për të prezantuar prioritetet e Kosovës,” shkruan Hoxhaj. Sipas tij, Serbia nuk ka ndalur përpjekjet e saj diplomatike, ndërkohë që Qeveria e Kosovës po vepron vetëm me interesa elektorale.

Hoxhaj paralajmëron se kthimi i mundshëm i Presidentit Trump në Shtëpinë e Bardhë mund të sjellë një politikë të re ndaj dialogut Kosovë-Serbi. “Me kthimin e Trump-it, është kyçe që të rikthehet njohja e ndërsjellë në dialog si prioritet i Kosovës dhe i SHBA-ve,” thekson Hoxhaj, duke sugjeruar se ndryshimi në Washington duhet të pasohet nga një ndryshim në Prishtinë.

Në përfundim, Hoxhaj vlerëson se rivendosja e marrëdhënieve të forta me SHBA-në është një prioritet për opozitën dhe për PDK-në, ndërsa akuzon Qeverinë Kurti se po humb kohë dhe hapësirë diplomatike në arenën ndërkombëtare, në dëm të interesave të Kosovës.

Postimi i plotë:

Në vend të keqpërdorimit të Ministrisë së Jashtme dhe Ambasadave për fushatë zgjedhore, Qeveria Kurti duhet ta vizitonte Washingtonin, të kontaktonte administratën në formim të Presidentit Trump dhe të prezantonte prioritetet e Kosovës, meqë Serbia jo vetëm gjatë fushatës zgjedhore në SHBA, por edhe këto ditë ka dërguar delegacione joformale drejt New York-ut, Florida-s dhe natyrisht në Washington!

Por kur vendi ka një qeveri të papërgjegjshme, e cila ka vetëm interesa elektoralë dhe kurrfarë interesi shtetëror, asaj i mungon vëmendja dhe vetëdija që ta kuptojë që Presidenti Trump nuk do të vazhdojë thjesht politikën e mëparshme, ku SHBA vetëm do të mbështesë dialogun Kosovë-Serbi dhe Bashkimin Evropian, por mund të jetë e kundërta, ku BE-ja do të ishte vetëm fasilitator, ndërsa SHBA-ja do të zgjidhte çështjet kyçe në Ballkan, duke përfshirë normalizimin e plotë në mes të Kosovës-Serbisë! Së bashku me rikthimin e Trump-it është kyçe që të rikthehet edhe njohja e ndërsjellë në dialog si prioritet i Kosovës, dhe i SHBA-së.

Kur sot tema kryesore në SHBA është se kush çfarë pozite do të marrë në politikën e jashtme dhe pozitat e rëndësishme përgjegjëse për Evropën dhe Ballkanin, Qeveria Kurti është e humbur në një kohë dhe hapësirë për të ndërmarrë ndonjë hap, gjë që tregon se rivendosja e marrëdhënieve me administratën Trump dhe me SHBA-në është vetëm temë e PDK-së, por edhe e opozitës, që ndryshimi në Washington të paraprihet edhe me ndryshimin që do të ndodhë në Prishtinë!