Haradinaj: Kosova duhet të mbetet vigjilente, Vuçiqi mund të veprojë si Putini

Ish-ministrja e punëve të jashtme në Qeverinë e Kosovës, Meliza Haradinaj, ka theksuar se Vuçiqi mund të veprojë si Putini në Kosovë, raporton Ekonomia Online.

Ajo ka thënë se Qeveria duhet të koordinohet me institucionet e sigurisë së SHBA dhe të mbajë veriun të qetë me çdo kusht sidomos deri pas zgjedhjeve të 9 shkurtit.

“Meqë jemi të vetëdijshëm për sjelljen e Vuçiqit që ndjek me fanatizëm librin e lojërave të Putinit, Kosova duhet të mbetet vigjilente ndaj përpjekjeve të ngjashme të mundshme destabilizuese në territorin e saj verior në kufi me Serbinë – sidomos në këtë periudhë tranzitore derisa Administrata Trump të rikthehet në Shtëpi të Bardhë”, ka shkruar ajo.

Haradinaj ka thënë se Vuçiqi padyshim se është dëshpërimisht në kërkim të një dritareje për të ndezur shkëndija destabilizimi në veri tani para fushatës zgjedhore në Kosovë, prandaj këtë herë ne nuk do të duhej të biem në provokimet e tij.

“Më e rëndësishmja: Qeveria duhet të koordinohet ngushtë me institucionet e sigurisë së SHBA dhe të mbajë veriun të qetë me çdo kusht sidomos deri pas zgjedhjeve të 9 shkurtit!” shkroi ajo.