Hamleti nga Ballkani flet për nderin dhe hakmarrjen

Një Hamlet i përafërt me atë të Shekspirit, që flet edhe gjuhën shqipe, me tekst të kënduar si rap, me monologje dhe dialogje

“Hamleti” i Shekspirit luhet nga gjashtë të rinj me prejardhje nga Ballkani. Ata sjellin në skenë rrëfimet e prindërve të tyre dhe familjeve. Dashuria, nderi, hakmarrja, vdekja, të gjitha këto fenomene që janë pjesë e një tragjedie, “jetojnë në një vend në mes të Maqedonisë, Kosovës, Greqisë, Turqisë dhe Zvicrës”.

Duke u nisur nga drama e princit të Danimarkës, i cili duke dëgjuar “urdhrin” e babait bëhet vrasës kundër vullnetit të tij, teatri “Szenart” inskenon me aktorë ballkanikë një Hamlet të përafërt me atë të Shekspirit, në gjuhën gjermane, në dielaktin zviceran, në gjuhën shqipe, serbe dhe kroate, me tekst të kënduar si rap, me monologje dhe dialogje.

Në fokus janë temat si familja, nderi dhe hakmarrja. Me këtë rast, aktorët, pos me tekstin e Shekspirit, shërbehen edhe me përvojat nga jeta e tyre.

Rolet i luajnë: Kastriot Fazlija, Metush Gjuraj, Nico Herzig/Leon Myftari, Robert Kirov, Fitim Lutfiu dhe Benjamin Kobi. Regjinë e ka bërë Hannes Leo Meier.

Premiera e shfaqjes jepet më 13 nëntor në orën 20.15 në teatrin Tuchlaube, Aarau, në kuadrin e festivalit të teatrove “Secondosfestival”.

Shfaqjet tjera jepen më 14 nëntor po ashtu në Tuchlaube, më 23 nëntor në Cinema Odeon, Brugg, etj.

“Hamleti” është një koproduksion i teatrit Szenart me teatrin Tuchlaube të Aaraut.(albinfo)