Grupi i Grave ua përkujton pushtetarëve ligjin për barazi gjinore

Gjilan – Në katër vjetorin e themelimit të Grupit të Grave të Komunës së Gjilanit, Jehona Hyseni kryetare e këtij grupi e ka përkujtuar dhe i ka bërë thirrje të parit të komunës , kryetarit Qemajl Mustafa, kryesuesit të Kuvendit dhe të gjitha partive politike që të kenë parasysh Ligjin për Barazi Gjinore, Statutin e Komunës dhe Rregulloren e Kuvendit.

Grupi i Grave të Komunës së Gjilanit në katër vjetorin e themelimit të saj ka bërë një syzhe të puëns dhe aktiviteteve të saja. Në këtë përvjetor ato më shumë janë marrë me defektet që lidhen me kyqjne e gruas në jetën institucionale.

Jehona Hyseni kryetare tha se Grupi i Grave të Komunës së Gjilanit është themeluar me 06 Mars 2009 duke marrë shembull Grupin e Grave Deputete të Parlamentit të Kosovës.

Hyseni tha se grupi është i përbërë nga këshilltaret e kuvendit komunal, përfaqësueset e minoriteteve dhe ka bashkëpunim të ngushtë me zyrën për barazi gjinore. Po ashtu bashkëpunon edhe me deputetet e parlamentit të Kosovës nga Rajoni i Gjilanit, OJQ-të, Qendrën për Mbrojtjen e grave dhe fëmijëve nga dhuna.

Qëllimi i këtij grupi sipas Hysenit ka qenë që ta ndihmojë zyrtaren për barazi gjinore në monitorimin e zbatueshmëris së Ligjit për Barazi Gjinore në institucionet lokale.

“Në nivelin lokal, ne mendojmë se nuk zbatohet ashtu si duhet Ligji për Barazi Gjinore. Ne si grup i grave apo si grup i këshilltareve komunale (të gjitha së bashku që jemi 15), kemi reaguar disa herë në Kuvendin Komunal të Gjilanit. Reagimet kanë dalë si reaksion i përbërjes së komiteteve të Kuvendit Komunal, përbërja e të cilave ka qenë në kundërshtim me Ligjin për Qeverisje Lokale, Ligjin për Barazi Gjinore dhe Statutin e Komunës” tha Hyseni.

Hyseni tha se nga 9 komitete, përkatësisht nga 65 anëtarë, 47 prej tyre janë meshkuj ndërsa vetëm 18 femra janë të përfshira në këto komitete, e kur kjo shprehet në përqindje, del se 72.3% janë meshkuj ndërsa vetëm 27.69% janë femra.

Mirëpo kjo gjendje ka ndryshuar me reagimin tonë sepse në fillim të formimit të këtyre komiteteve kjo përqindje ka qenë vetëm 19.3% përfshirja grave

Hyseni tha se në tri komitete, nuk kishte asnjë femër të përfshirë, dy komitete obligative siç janë: Komiteti për Politikë dhe Financa që përbëhet nga 9 burra, Komiteti për komunitete 7 burra dhe Komiteti për Shëndetësi nga 7 burra.

“Një situatë e tillë e pa pëlqyeshme na ka nxitur që të reagojmë në një seancë të qershorit të vitit 2010, ku kemi insistuar që të fusim në rend të ditës një pikë të veçantë: Zbatimi i Ligjit për Barazi Gjinore ngase një gjendje e tillë u vlerësua si shkelje e normave ligjore dhe diskriminim gjinor” mendon Hyseni.

Sipas Hysenit gjendja është e njëjtë edhe në komitetet e drejtoritë e tjera .“Kemi 12 Drejtori, nga to vetëm një drejtori udhëhiqet nga 1 femër. Pastaj edhe punësimi i femrave nëpër drejtori është shumë i vogël.

Edhe Mimoza Shkodra tha se ia vlen të përmenden tri iniciativa shumë të rëndësishme nga GGKGJ për këta muajt e fundit.
“Iniciativa e parë ka të bëjë me inicimin e një projekt për hapjen e një zyre për fuqizimin ekonomik të gruas në Komunën e Gjilanit, i cili pritet të kalohet në projekt buxhetin për vitin 2014 në Parlamentin e Republikës së Kosovës, ku mendoj se jemi në rrugë të mbarë drejt finalizimit. Iniciativa e dytë ka të bëjë me pjesëmarrjen e GGKGJ me 6 anëtare në Mekanizmin Koordinues kundër dhunës në familje që po harton një strategji së bashku me të gjitha institucionet e Komunës dhe po japin një kontribut të veçant në ketë mekanizëm për luftimin e kësaj dukurie. Gjithashtu jemi duke e bërë një marrëveshje me OJQ “Gratë në Biznes”, të cilat kanë ofruar një bashkëpunim shumë të mirë për mbajtjen e tryezave dhe ofrimin e njohurive për buxhetimin gjinor” tha Shkodra.

Drita Klaiqi zyrtare për barazi gjinore tha se nga projektet e realizuara kanë arritur sadopak këtë sensibilizojnë dhe informojnë për përmirësimin e pozitës së gruas në shoqëri.

Jehona Hyseni në fund e ka përkujtuar dhe i ka bërë thirrje të parit të komunës – kryetarit Qemajl Mustafa, kryesuesit të Kuvendit dhe të gjitha partive politike që të kenë parasysh Ligjin për Barazi Gjinore, Statutin e Komunës dhe Rregulloren e Kuvendit./rajonipress/