Gradimi i dyshimtë në profesorë i pesë dekanëve të UP-së

Rezultatet e konkursit për avancim akademik në shtator të vitit të kaluar tregojnë se përveç ish-rektorit Gashi, u avancuan pa merita edhe pesë dekanë të Universitetit të Prishtinës, duke përfshirë edhe Bujar Dugollin, ish-ministër për Tregti e Industri nga radhët e AAK-së dhe ish-kandidatin për deputet në listën e PDK-së më 2010, shkruan Gazeta JNK.

Një punim i Bujar Dugollit i publikuar më 2005 në revistën javore Fokus që drejtohej nga Rasim Selmanaj i AAK-së, i është llogaritur atij si publikim me recension ndërkombëtar nga një komision vlerësues i Universitetit publik të Prishtinës.

Kjo i ka ndihmuar Dugollit, dekanit të Fakultetit Filozofik që të avancohet në shtator të vitit të kaluar nga profesor asistent në gradën profesor i asociuar.

Kjo gradë është e dyta për nga rëndësia, pas asaj të profesorit të rregullt.

Por kjo revistë nuk është pjesë e listës së revistave me Impact Factor (IF) të publikuara në faqen zyrtare të Thomson Reuters Journal Citation. Me IF llogariten revistat, punimet e të cilave janë të cituara nëpër revista shkencore ndërkombëtare.

Përveç këtij punimi që trajton rrethanat politike e shoqërore të Perandorisë Osmane gjatë viteve 1907-1912, Dugollit i janë llogaritur edhe disa të tjera si punime shkencore me recension ndërkombëtar (Impact Factor).

I janë vlerësuar si punime me recension ndërkombëtarë dy punime që janë publikuar në revistën “Diskutime” që e nxjerr një institut i Universitetit të Tiranës.

Vlerësim të tillë kanë marrë edhe shtatë të tjera në revistën “Vjetari” që e nxjerr Agjencia Shtetërore e Arkivave të Kosovës dhe një në revistën “Scupi” që botohet nga një institut shqiptar me seli në kryeqytetin e Maqedonisë.

Statuti i UP-së dhe Ligji mbi Arsimin e Lartë kërkojnë që kandidati për profesor të asocuar të ketë së paku tri punime të publikuara në revista shkencore me recension ndërkombëtar.

Rektorati i UP-së bën përgjegjës anëtarët e komisioneve për gradimet.

“Për të gjitha çështjet që shkruhen në raport për zgjedhjen, ose avancimin e kandidatëve, përgjegjës ose kompetent është Komisioni Vlerësues-Profesional që shkruan recension për kandidatin përkatës”, ka thënë Esat Kelmendi, sekretar i përgjithshëm në UP.

Avancimi i Dugollit u bë në të njëjtin muaj kur ndodhi edhe gradimi në thirrjen profesor i rregullt, i rektorit të dorëhequr Ibrahim Gashi.

Ish-rektori u avancua falë botimeve në një revistë të dyshimtë indiane, duke dhënë dorëheqje pas një javë protestash të nisura nga studentët.

Përkundër faktit që Dugolli është i njohur si një prej liderëve kryesorë të protestave të studentëve gjatë nëntëdhjetave, ai ishte kritik i ashpër i protestave të studentëve të muajit të kaluar që kërkonin, mes tjerash, verifikim të avancimeve të profesorëve në UP.

Këto protesta rezultuan me dorëheqjen e rektorit të UP-së dhe gjithë Këshillit Drejtues, por jo edhe të dekanëve, të cilët kanë avancuar në mënyra të dyshimta.

Më gjerësisht lexoni në Gazetën Jeta në Kosove.