Gjykata rikonfirmon: 19 vjet burg kosovarit për vrasjen e të shoqes

Vrasja e cilësuar si mizore dhe e paskrupullt, edhe nga gjykata e kantonit u kualifikua si vrasje e rëndë për të cilën dënimi me 19 vjet burg është adekuat.

Ashtu sikurse dhe ishte pritur, Gjykata e Kantonit të St. Gallenit, i ka vërtetuar dënimin me 19 vjet burg për vrasje të rëndë kosovarit që kishte vrarë të shoqen.

Më parë, Gjykata e qarkut në St. Gallen e kishte dënuar kosovarin sot 47 vjeçar për vrasje të rëndë, me 19 vjet burg. Ai, në vitin 2011 kishte shkelur qëllimisht me makinë bashkëshorte nga e cila jetonte ndaras. Pasi që ajo nuk kishte vdekur nga goditja e makinës, dorasi kishte dalë dhe e kishte goditur atë edhe disa herë me një shkop hekuri, duke i shkaktuar vdekjen.

Kjo vrasje e cilësuar si mizore dhe e paskrupullt, nga gjykata kompetente ishte kualifikuar si vrasje e rëndë për të cilën dënimi me 19 vjet burg ishte adekuat.

Rreth dy vjet pas gjykimit, kosovari kishte bërë ankesë në Gjykatën e Kantonit të St. Gallenit, duke kërkuar që vepra e tij penale të kualifikohet si vrasje me paramendim por jo si vrasje e rëndë, me çka do t`i ulej dukshëm vuajtja e dënimit në burg. Avokati i tij kishte kërkuar që dënimi t`i ulej në dhjetë vjet burg.

Sipas dorasit, ai ishte shtyrë të kryente vrasjen pasi që e shoqja (nga e cila jetonte i ndarë) mbante marrëdhënie me një burrë tjetër dhe kjo i kishte prekur nderin atij.

Por, trupi gjykues ka theksuar se ky arsyetim nuk e ulte shkallën e krimit pasi që, gruaja kishte pasur arse të largohej nga ai, duke pasur parasysh keqtrajtimet që ai i kishte bërë.

Edhe dy fëmijët e çiftit, të dy të moshës adoleshente, në gjykimin e parë kishin kërkuar që babait të tyre t`i shqiptohej një dënim sa më i lartë.

Edhe në rigjykimin e kryer të martën në Gjykatën e Kantonit, është konfirmuar vendimi i marrë në gjykimin pararendës. Trupi gjykues nuk ka luajtur nga qëndrimi për caktimin e masës së dënimit prej 19 vitesh burg.

Gjykata e Qarkut, kur i kishte shqiptuar dënimin e përmendur, kishte ndjekur në tërësi kërkesën e prokurorisë, ndërsa avokati kishte kërkuar dënim me jo më shumë se dhjetë vjet burg, për vrasje me paramendim.

Procesi gjyqësor në Gjykatën e Kantonit të St. Gallenit është zhvilluar dhe ka përfunduar të martën por vendimi gjyqësor është bërë publik sot, të mërkurën.

Vendimi ende nuk është i plotfuqishëm, i dënuari ka të drejtë ankese. (albinfo.ch&sda)