Gjini: Në pe të hollë është vendosur e ardhmja e vendit

Shefi i Grupit parlamentar të Aleancës për Ardhmërinë e Kosovës, Ardian Gjini tha të enjten se duke e shkatërruar Universitetin e Prishtinës, është duke u shkatërruar edhe e ardhmja e vendit, e cila është vendos në fije peri.

Gjini tha se të gjithë intelektualët e vërtetë sot ndihen të fyer me atë që është duke ndodhur në UP, ndërkaq e quajti të pakuptimtë rezistencën e rektorit Ibrahim Gashi për të dhënë dorëheqje.

“Në pe të hollë është tu u varë e ardhmja e Kosovës”, u shpreh shefi i GP-së të AAK-së.

Ai tha se kur shkatërrohet një universitet, shkatërrohet edhe e ardhmja e atij vendi.

Sipas tij, një doktor shkence duhet t’i dijë cilat janë gazetat akademike, pasi siç tha ai nëse nuk i dinë atëherë nuk mund të jetë doktor shkence. Por sipas tij, nëse një doktor shkence shkruan në ato gazeta për të cilat e dinë se ato nuk janë akademike, atëherë ai është edhe mashtrues. /Telegrafi/