Gjimshiti kthehet në vitin 2016: Mungova herën e parë, por tani edhe unë dua të luaj në Evropian

Berat Gjimshiti është padyshim lideri i mbrojtjes së Shqipërisë dhe kështu ishte edhe në ndeshjen ndaj Moldavisë.

Mbrojtësi shqiptar bëri paraqitje fantastike dhe ishte ndër më të mirët në fushë.

Ai ditë më parë u bë baba, derisa tani fitoi me Shqipërinë duke e konsideruar si një javë perfekte.

“U bëre baba dhe tashmë vjen edhe fitorja me Shqipërinë. Jam i lumtur që bashkëshortja dhe vajza janë mirë. E merituam fitoren duhej të ishim të duruar, u përballëm mirë dhe në fund e gjetëm golin”.

“Ndeshja e parë në drejtimin e Sylvinhos, çfarë ka ndryshuar? U bë kohë që nuk kam qenë në kombëtare, kam gjetur një ekip me shumë besim. Lojtarë të rinj me shumë cilësi, lojtarët kishin besim me topin në këmbë dhe kjo u duk edhe në fushë”.

“Trajneri i jep shumë besim lojtarëve dhe kjo është diçka shumë e mirë. Entuziazmi vjen edhe nga trajneri, por edhe lojtarët që flasim me njëri-tjetrin”.

Gjimshiti nuk e ka harruar vitin 2016, kur çuditërisht nuk ishte në listën përfundimtare të De Biazit për Kampionatin Evropian.

Gjithsesi ai i qëndroi besnik Shqipërisë dhe tani është lider i kuqezinjve ku ka thënë se dëshiron të luaj edhe ai në Evropian.

“Duket që të gjithë e kemi dëshirën për të shkuar në Evropian dhe duken cilësitë, kemi mundësi për të shkuar në Evropian. Pastaj flet fusha dhe aty duhet ta tregojmë besimin”.

“Mungove në Evropianin e 2016-tës? Besoj se këtë radhë edhe unë e kam mundësinë të luaj në Evropian”, u shpreh Gjimshiti. /Telegrafi/