Gjilani publikon Buletinin e radhës në version elektronik

Gjilan – Komuna e Gjilanit ka publikuar numrin e dytë të Buletinit për vitin 2015, që është një revistë periodike informative ku pasqyrohet puna dhe angazhimet e qeverisjes komunale.

Për të kursyer buxhetin e Komunës, i cili krijohet nga taksat e qytetarëve dhe duke marrë parasysh faktin se teknologjia informative, si mundësi më e madhe e shpërndarjes së informacionit, tashmë është bërë mjeti më i preferuar i komunikimit, ky numër botohet vetëm në versionin elektronik në ueb faqe të Komunës.

Buletini është një mundësi më shumë për informimin e publikut mbi punën e qeverisjes, të cilën ata e kanë zgjedhur me votën e tyre, për t`iu shërbyer brenda një mandati katërvjeçar.

Ky numër i Buletinit, që përgatitet nga Zyra për Informim, hapet me editorialin e kryetarit të Komunës, me titull “Gjilani po hyn në një epokë të re”, që bën fjalë për investimet e mëdha që do të fillojnë sivjet në Gjilan, për të vazhduar me materiale të tjera, që janë të rëndësishme për transparencë me publikun.

Pjesë e këtij numri, që përfshin periudhën kohore korrik-dhjetor 2015, janë edhe informatat që pasqyrojnë punën e vendimmarrësve, muaj pas muaji, angazhimet e veçanta të kryetarit të Komunës për zgjidhjen e problemit të strehimit për familjet me gjendje të rëndë sociale, përmes fondit të solidaritetit si dhe shumë aktivitete të tjera të këtij gjashtëmujori.

Buletini është revistë periodike dhe numri tjetër do të publikohet në fund të qershorit 2016./rajonipress/