Gjilani në garën e dizajnit urban

Sivjet do të jetë viti i dytë që një qytet i Kosovës do të ketë mundësi të konkurojë në garën më të njohur të dizajnit urban në Evropë, i njohur me emrin “Europan”. Vitin e kaluar ishte qyteti i Pejës ai që përfaqësoi në këtë garë urbanizmin kosovar, pa sukses për t’u futur në treshen më të mirë, me gjithë vendin e tretë të fituar nga ekipi austriak pjesë e të cilit ishte një arkitekt shqiptar po nga Peja.

Gjilani është i përzgjedhuri i këtij viti, ndërsa promovon planifikimin e tij urban, zhvillimin e kësaj fushe dhe tentimin për të garuar me projektet tjera. Eliza Hoxha tregon për “Zërin” se tanimë është themeluar dhe legjitimuar edhe “Europan-Kosova”, si pjesë zyrtare e këtij rrjeti të bienales.

“Europan Kosova ka sekretariatin e tij tashmë të establishuar dhe mëton të zhvillohet tutje si qendër lokale e promovimit të kësaj bienaleje, por njëkohësisht edhe të promovimit të konkursit si formë pune, pastaj formave të reja dhe iniciativave të reja vizavi atyre globale”, tregon Hoxha. “Europan” është bienale e dizajnit urban ku marrin pjesë shtete të ndryshme të botës duke dhënë në dispozicion lokacione të caktuara për trajtim, dizajn e hulumtim. Gara e sivjetshme ka koncept “Qytetin e adaptueshëm”, me nënkuptim lehtësinë për të përqafuar ndryshimet e mundshme në ambient, apo në subjektet prej të cilave është ndërtuar dhe të cilave u detyrohet.

“E rëndësishme ëshë të kuptohet se interesi i përfshirjes së Kosovës në këtë rrjet apo bienale dizajni nuk është që ekspertët e fushës arkitektë, dizajnerë, planer urban të konkurrojnë në lokacionin e tyre lokal, por mundësia që profesionistët kosovarë t’i qasen dhe të kenë mundësi konkurrimi në lokacionet e shumta globale të cilat janë pjesë e Europan 12”, vazhdon Eliza Hoxha. Vitin e kaluar, ishin 17 projekte që adresuan dhe dhanë ide për lokacionin e Pejës, me ç`rast vendi i parë shkoi për ekipin spanjoll, i dyti për atë italian dhe i treti për ekipin austriak.

“Kjo mund të jetë një platformë e re komunikimi dhe shkëmbimi idesh dhe metodash kontemporane se si duhet t’u qasemi qyteteve në të ardhmen”, përfundon Hoxha. Procesi i “Europan 12”, ka filluar qysh në qershor të vitit të kaluar kur edhe fillojnë shqyrtimet e lokacioneve dhe më pas edhe aplikimi për t’u bërë pjesë e garës. Rezultatet e më të mirëve shpallen në fund të vitit, ndërsa një forum i cili pason me shqyrtimin e projekteve fituese, por edhe të tjerave mbahet në maj të vitit tjetër.(zeri)