Gjilani dhe Anamorava në festë

Gjilan – Gjilani, Kamenica e Vitia janë stolisur për nder të festës së Flamurit. Lutfi Haziri, Sokol Haliti e Begzad Sinani kanë uruar qytetarët. Për festën e 28 Nëntorit janë paraparë aktivitete të shumta kulturore e sportive.

Gjilani të premtën është në festë dhe kudo vërehet një atmosferë festive. Kryetari i Komunës së Gjilanit Lutfi Haziri, ka uruar qytetarët me rastin 28 Nëntorit, Ditës së Flamurit dhe 102-vjetorit e shpalljes së Pavarësisë së Shqipërisë.

Në mesazhin e urimit thuhet: “Të dashur qytetarë të Gjilanit, më lejoni që në emrin tim personal dhe të të gjitha institucioneve të Komunës së Gjilanit, t’ju uroj nga zemra Festat e Nëntorit, 102-vjetorin e Shpalljes Pavarësisë së Shqipërisë dhe Ditën e Flamurit.

Në këtë ditë të shënuar për kombin tonë, ne respektojmë e nderojmë dëshmorët tanë si Mulla Idriz Gjilanin, Idriz Seferin, Agim Ramadanin, Zenel Hajdinin, Abdullah Preshevën, Musa Zajmin, e shumë dëshmorë e martirë të tjerë, të cilët sakrifikuan gjënë më të shtrenjtë për të mirën e përgjithshme.

Në këtë ditë, poashtu, kujtojmë me dhimbje 70- vjetorin e masakrës së madhe të Gjilanit dhe ekspeditës ndëshkuese për shkak të përpjekjeve të luftës për liri, ku u masakruan mbi 8000 qytetarë, ose gjysma e popullatës së atëhershme.

Është dhimbje dhe përkulje e madhe për të gjithë këta dëshmorë, martirë dhe njerëz që vuajtën, por asnjëherë nuk u ndalën në përpjekjet e tyre për liri ka shtuar Haziri.

Edhe kryetari i Komunës së Vitisë, Sokol Haliti, dhe përfaqësuesit e institucioneve komunale, i urojnë gjithë kombit shqiptarë, 28 Nëntorin – Ditën e Pavarësisë së Shqipërisë si dhe Ditën e Flamurit Kombëtar.

Begzad Sinani ka uruar qytetarët e Kamenicës për festën e flamurit si një ditë e veçantë dhe e rëndësishme për shqiptarët.

Të gjitha komunat e Anamoravës për festën e 28 nëntorit kanë paraparë programe e aktivitete të shumta kulturore e sportive.

Komuna e Gjilanit të premten mbanë Turneun Ndërkombëtar të Basketbollit në Karroca, pastaj marshim me biçikleta nëpër rrugët e qytetit, nisja nga platoa e Teatrit
Me pjesëmarrjen e anëtarëve të Klubit të Biciklistëve të Gjilanit./rajonipress/