Gjashtë shtetas të huaj zbulohen në një kamion në Gjilan, nisin hetimet për kontrabandë me migrantë

Gjilan – Një rast i dyshuar i kontrabandës me migrantë është regjistruar në Gjilan, pasi policia zbuloi gjashtë shtetas të huaj të fshehur në një kamion gjatë shkarkimit të mallrave.

Sipas Policisë së Kosovës, informacioni është pranuar rreth orës 11:05, ndërsa njësitet policore kanë dalë menjëherë në vendngjarje, ku kanë konstatuar se në rimorkion e kamionit ndodheshin gjashtë meshkuj, shtetas të huaj.

Ata, së bashku me drejtuesin e kamionit, janë shoqëruar në stacionin policor në prani të prokurorit. Pas intervistimit, shtetasve të huaj u janë lëshuar vërtetimet për akomodim sipas procedurave në fuqi dhe janë liruar, ndërsa edhe drejtuesi i kamionit është liruar në procedurë të rregullt.

Rasti është cilësuar si kontrabandë me migrantë dhe mbetet në fazën e hetimeve për zbardhjen e plotë të rrethanave./rajonipress/