Gazeta “Le Monde” flet për punën e çmuar të G. De Biasi

Njëra nga gazetat më prestigjioze të Francës, “LE MONDE”, në numrin e saj të djeshëm ka pasqyruar punën e suksesshme të trajnerit Giovani de Biasi me Kuqezinjtë e Shqipërisë.

Po ashtu artikulli trajton tërheqjen e shortit për evropianin “Franca 2016”, të zhvilluar më 12 dhjetor të vitit që shkoi në Pallatin e Kongreseve në Paris.

Pastaj vazhdohet me interesimin e jashtëzakonshëm të gazetarëve për të marrë mendimin e trajnerit Giovani De Biasi rreth skuadrave me të cilat Shqipëria do të përbëjë Grupin A.

Shumica e pyetjeve drejtuar përzgjedhësit të kombëtares sonë kishin të bënin me takimin Francë – Shqipëri, që do të zhvillohet më 15 qershor të këtij viti në stadiumin “Veledrome” të Marsejt.

Giovani De Biasi, i qetë dhe i njohur për gjakftohtësi, me italishten e tij të butë që e ka edhe gjuhë të veten, e aty – këtu me disa fjalë në spanjisht e anglisht, ka shprehur opinionin e tij rreth skuadrave kundërshtare të Shqipërisë.

Pastaj në shkrim në mënyrë kronologjike citohet edhe karriera prej futbollisti e trajnerit Giovani De Biasi. Thuhet se në pozitën e mesfushorit De Biasi ka luajtur në FC Brescia, prej vitit 1978 e deri më 1983, duke dëshmuar vetën në këtë rol. Përmblidhet edhe kontributi i tij po në pozitën e mesfushorit për katër vjet me radhë në FC Palermo.

Pas përfundimit të karrierës si futbollist, Giovani De Biasi nis punën e trajnerit.

Edhe në këtë fushë ai tregohet i vyeshëm. Së pari e profilizon dhe e pozicionon si duhet FC Torino dhe pastaj kalon në FC Udineze, me të cilën arrin rezultate të kënaqshme.

Të dyja ekipet e përmendura atëbotë bënin gara në të ashtuquajturën SERIE A të Italisë.

Mirëpo De Biasi kulmin e suksesit e shënon me kombëtaren e Shqipërisë, të cilën për herë të parë e shpije në Kampionatin Evropian “FRANCA 2016”.

Autoritetet shqiptare të motivuara nga ky sukses në mars të vitit 2015 i japin Giovani De Biasit shtetësinë shqiptare.

Tani përzgjedhësi i kombëtares shqiptare posedon shtetësi italiane-shqiptare.

Artikullshkruesi Rémi Dupré përmend edhe mbrojtjen e hekurt të Shqipërisë, të dirigjuar nga kapiteni Lorik Cana, lojtar i dikurshëm i FC Marseille të Francës.
Shqipëria, si befasia më e këndshme në kualifikimet e evropianit “Franca 2016”, ka lënë jashtë pjesëmarrjes në “FRANCA 2016” danezët, të cilëve ndër vite shumë skuadra me nam ua kanë pasur frikën.

Shumë mbresëlënëse përshkruhet edhe ndeshja miqësore e zhvilluar në nëntor të vitit 2014 në Rennes, ndërmjet Francës dhe Shqipërisë, e cila pati përfunduar me rezultat 1:1.

Ndër të tjera përmendet edhe vlerësimi i Federatës Ndërkombëtare të Futbollit me seli në Zurich të Zvicrës, e cila ngritjen e nivelit të lojës së Shqipërisë dhe pjesëmarrjen e saj në evropianin e sivjetmë “FRANCA 2016” e vlerëson pozitivisht, duke e renditur atë në vendin e 38-të në plasmanin e përgjithshëm./arif ejupi/albinfo/