Gashi: Duhet edhe mbështetje politike për çështjet akademike

Qëkur Ibrahim Gashi është zgjedhur rektor në UP, ka pasur fjalë se ka ardhur në post me ndikime politike. Por, Gashi thotë se në çdo vend të botës në universitetet publike rektori duhet ta ketë mbështetje politike për të zbatuar vizionin dhe politikat akademike për zhvillimin e institucionit.

Por që nga dita e parë e fillimit të punës rektorit i është dashur të angazhohet për të identifikuar dhe rregulluar shumë probleme dhe parregullsi që janë trashëguar nga udhëheqja e kaluar. Gashi në një intervistë për “Tribuna Shqiptare”, premton se shumë shpejt do të rregullohen gjërat.

Ai ka theksuar disa arritje që janë bërë vetëm për dy muaj, e njëra ndër to është edhe digjitalizimi i provimit pranues, e cila pritet të bëhet në vitin e ardhshëm. Rektori Gashi ka njoftuar se në UP, në janar 2013 do të fillojnë ligjëratat në studimet e doktoratës në gjashtë programeve studimore, me rreth 100 doktorantë

Për mosplotësimin e stafit akademik në UP, Ibrahim Gashi, ka thënë se ka pasur mjaft konkurse, ndërsa UP është mbështetur shumë në staf të angazhuar nga jashtë me kontratë njëvjeçare. “Mendojmë se kjo nuk e zgjidh problemin. Ne do të hapim konkurse për të rekrutuar staf të rregullt”, ka thënë Gashi.