Fundjava me reshje të dendura shiu e bore, mund të ketë vërshime të shpejta

Instituti Hidrometeorologjik bën të ditur se fundjava parashihet me reshje të dendura të shiut dhe borës.

IHK njofton se kjo situatë vjen si rrjedhojë e masave të lagështa të ajrit me origjinë jugore.

“Në shumë vende të ulëta dhe në qytete me infrastrukturë të dobët parashihen vërshime të shpejta”, thuhet në njoftimin e IHK-së.

Instituti tutje thekson se të shtunën parashihet të mbajë mot kryesisht i vranët dhe me reshje shiu dhe bore.

Temperaturat minimale do të lëvizin ndërmjet -1 deri 1 gradë Celsius, ndërsa maksimalet e ditës parashihen të lëvizin ndërmjet 1-3 gradë Celsius.

Do të fryjë erë kryesisht nga verilindja me shpejtësi 1-9m/s.

Ndërkaq, për të dielën parashihet të mbajë mot kryesisht i vranët dhe me reshje shiu dhe bore.

Në fushat termike parashihen rritje të lehta në të dy vlerat ekstreme.

Minimalet do të lëvizin ndërmjet 0-2 gradë Celsius, ndërsa maksimalet e ditës parashihen të lëvizin ndërmjet 3-5 gradë Celsius.

Do të fryjë erë kryesisht nga verilindja me shpejtësi 1-7m/s. /Telegrafi/