Flakareshat e ambasadorëve

Nga Sinan Sadiku – Po të mos na mbronin SHBA-të: shqiptarët, Republika e Shqipërisë, Republika e Kosovës, nuk e di a do të ekzistonin?! SHBA na ka mbrojtur disa herë nga armiqtë e jashtëm (Serbia… ) dhe janë duke na mbrojtur nga vetvetja! Prej vitit 1990 e këndej, Shqipëria ka pushuar së funksionuari si shtet dy herë: në vitin 1990 kur rendin e kthyen dhe e mbrojtën Karabinieria Italiane në marrëveshje me SHBA-të, dhe në vitin 1997 kur lufta e shqiptarëve kundër shtetit të vet i shkatërroi institucionet shtetërore, duke përfshi edhe ushtrinë!

Ishin SHBA-të ato që e mbrojtën Shqipërinë, se përndryshe shtetet fqinjë do ta copëtonin pa i humbur as 100 ushtarë! Po të mos ishin masat parandaluese të amerikanëve, shqiptarët do ta shkatërronin shtetin e vet edhe disa herë të tjera, por ata (amerikanët) nuk po i lejojnë.

Madje po e shohin kiametin me ta, nuk po e kanë hiq lehtë me i pengue, mos me i lanë me prishë shtetin e vet! Sa na përket neve shqiptarëve të Kosovës, po të mos na mbronin amerikanët me neve do të kryente punë Serbia e Millosheviqit dhe Kosova do të ishte ashtu siç është Sanxhaku i Nishit. Megjithatë amerikanët i harxhuan qindra miliarda dollarë, e vunë në lëvizje tërë botën, e ndryshuan rendin botëror dhe na mbrojtën.

Na mbrojtën dhe na bënë shtet, për aq sa mund të bëhet shteti nga shqiptarët, të cilët e kanë plot gojën liri, shtet…, ndërsa në realitet punojnë kundër lirisë dhe kundër shtetit të vet! Po flas për shqiptarin real, e jo për shqiptarin e këngëve folklorikë, për shqiptarin e eposit të kreshnikëve. Edhe nëse ka një forcë që e pengon Serbinë 100%, që nuk e lejon atë t’ia shkaktojë qoftë edhe një dëm të vogël Kosovës, neve na duhen amerikanët për të na mbrojtur nga vetvetja. Ne e shkatërrojmë Republikën e Kosovës, ne ia marrim lirinë njëherë pjesës më të madhe të shqiptarëve e në fund edhe veti!

Ne hahmi mish ner veti, derisa të mos mbetemi asnjë! Tani më nuk duhet të jesh i mençur që ta shohësh se sjellja e udhëheqësve tanë si në Shqipëri ashtu edhe në Kosovë është sjellje pa asnjë përgjegjësi, është si sjellja e disa fëmijëve të lazdruar, të çoroditur të cilëve nëse herë herë nuk ua jep nga një ose disa shpulla e kallin shpinë! Ambasadorët e shteteve dërgohen në shtetet tjera për t`i mbrojtur interesat e shtetit që i dërgon.

Sa i përket Kosovës, ambasadorët e shteteve mike kanë shumë më shumë punë, shumë më shumë sfida. Detyra kryesore e tyre është ta mbrojnë shtetin e Kosovës nga ata për të mirën e të cilëve është krijuar, sepse nëse nuk e mbrojnë ambasadorët, atë e prishin shqiptarët, madje edhe për inati të Amerikës! Pra ambasadorët e shteteve mike në Kosovë nuk guxojnë t`ia lejojnë veti luksin dhe të sillen si ambasadorë!

Atyre u duhet të sillen si kujdestarë të udhëheqësve tanë , të udhëheqësve të cilëve u munguan përgjegjësia e burrështetasve, dhe sillen e veprojnë si fëmijë të lazdruar, të çoroditur. Andaj këta fëmijë të çoroditur i bien n’men veç shpullat, flakareshat e ambasadorëve. Shtrohet pyetja pse po na mbrojnë shtetet mike? Përkundër disave që mendojnë se Amerikanët na kanë mbrojtur dhe na mbrojnë sepse kanë interesa të mëdha, interesa ekonomike, strategjike… , unë nuk mendoj ashtu.

Për bindjen time Kosova me një sipërfaqe prej më pak se 11 mijë kilometra katrorë, me rreth 1.5 milion banorë nuk qon kurrfarë peshe për SHBA-të, as sa i përket pasurisë që e posedon, as hapësirës, as…

Neve Amerikanët dhe popujt e civilizuar janë duke na mbrojtur siç mbrohet një specie në zhdukje e sipër. Ne i vrasim kaprojtë, shqiponjat, arinjtë… dhe krenohemi për “heroizmin” tanë, ndërsa popujt e civilizuar investojnë me dhjetëra miliarda dollarë për t`i ruajtur ato specie të rralla.

Andaj mendja jonë nuk arrin ta kuptojë se si dikush mund të shpenzojë aq shumë për të na mbrojtur neve, si specie në zhdukje e sipër!/rajonipress/