Emir Sahiti ‘hero’ për Hamburgun – shënon golin e fitores ndaj Hertha Berlinit

Hamburgu ka shënuar fitore me rezultat 3-2 në udhëtim ndaj Hertha Berlinit në kuadër të javës së 19-të në kategorinë e dytë të futbollit gjerman.

Ishte një ndeshje fantastike mes këtyre dy skuadrave e cila u përcoll me dramë deri në fishkëllimën e fundit të gjyqtarit.

Në fakt, Hamburgu pati një epërsi prej dy golave dhe dukej se vendasit nuk do të kenë fuqinë të ndryshojnë rrjedhën e ndeshjes, por në fakt ata u rikthyen duke barazuar rezultatin.

Kështu në skenë doli futbollisti kosovar Emir Sahiti, i cili në minutën e 84-të gjeti rrjetën duke shënuar për rezultatin 3-2.

Ky ishte goli i fitores për Hamburgun pasi ata deri në fund të ndeshjes ia dolën ta menaxhojnë mirë epërsinë e krijuar duke mos lejuar që tri pikët t’u rrëshqasin nga duart.

Kujtojmë se për 26-vjeçarin ky ishte goli i parë këtë edicion në kampionat pas tetë ndeshjeve të luajtura./Telegrafi/