Dyshja Mustafa-Thaçi vulosin rrënimin ekonomik

Keqësim i jashtëzakonshëm i ambientit për biznes.Treguesit janë negativë edhe për vitin 2016

Bizneset po ikin në vende fqinjë, sepse po u pamundësohet nga politika e gabuar të zhvillohen. Me këtë qeverisje, papunësia është thelluar e qytetarët po varfërohen

Bazuar në vlerësimet e deputetëve opozitarë, përfaqësuesve të biznesit dhe ekspertëve të ekonomisë, kulmin e dështimit në zhvillimin ekonomik e ka arritur Qeveria e dyshes Isa Mustafa – Hashim Thaçi, të cilët e përkeqësuan ambientin biznesor, shtrenjtuan çmimet, rritën korrupsionin dhe dekurajuan investitorët.

Kryetari i AKB-së, Agim Shahini, thotë se me gjithë ndryshimet e bëra në politikat fiskale, prapëseprapë duhet të jemi realistë se asnjëra nga qeveritë e pasluftës në Kosovë me politikat e tyre fiskale nuk kanë bërë sa duhet për bizneset vendore. “Ne importojmë diku më shumë se 2.5 miliardë euro, ndërsa eksportojmë diçka më shumë se 400 milionë euro”, theksoi ai.

Sipas Shahinit, indikatori tjetër me rëndësi është fakti se në një vend ku shteti është punëdhënësi më i madh, sikurse që është te ne sektori i administratës publike që ka më shumë se 80 mijë të punësuar, kjo është treguesi më i qartë se çfarë kahu të gabuar ka ekonomia./kosova sot/