Dy raste të armëmbajtjes në Viti e Gjilan, konfiskohet një pistoletë, raportohet edhe vjedhje armësh

Viti/Gjilan – Dy raste që lidhen me armëmbajtje janë raportuar gjatë 26 shkurtit 2026 në rajonin e Vitisë dhe Gjilanit, ku në njërin rast është konfiskuar një armë, ndërsa në tjetrin po hetohet një vjedhje që përfshin edhe armë zjarri.

Rasti i parë ka ndodhur rreth orës 00:30 në rrugën “Rexhep Bislimi” në Viti, ku tek një i dyshuar mashkull kosovar është gjetur dhe sekuestruar një pistoletë që dyshohet të jetë me gaz. I dyshuari është shoqëruar në stacionin policor për intervistim, ndërsa arma është konfiskuar. Me urdhër të prokurorit, rasti është iniciuar në procedurë të rregullt.

Ndërkaq, rreth orës 20:30 në rrugën “Ramiz Cernica” në Gjilan, një ankues mashkull kosovar ka raportuar se persona të panjohur kanë depërtuar me forcë në shtëpinë e tij, nga ku kanë vjedhur 1,000 euro para të gatshme, një pistoletë me leje, një pushkë gjuetie pa leje, si dhe modemin e kamerave të sigurisë.

Lidhur me këtë rast është njoftuar prokurori kompetent dhe hetimet janë në zhvillim për identifikimin dhe kapjen e të dyshuarve.

Autoritetet policore apelojnë tek qytetarët që të respektojnë dispozitat ligjore lidhur me posedimin dhe ruajtjen e armëve, si dhe të bashkëpunojnë me organet e rendit në parandalimin e veprave penale./rajonipress/