Drilon Shala transferohet në Turqi

Sulmuesi kosovar, Drilon Shala, është larguar nga Lahti finlandez pas shtatë viteve të kaluara te kjo skuadër. Shala 25-vjeçar ka firmosur me skuadrën e kategorisë së dytë turke, Tavsanli Linyitspor. Shala me klubin turk ka firmosur kontratë të vlefshme për një vit e gjysmë.

Ai pjesë e Lahtit ishte nga fillimi i vitit 2006. Për këtë skuadër ka zhvilluar 100 ndeshje në kategorinë e parë të Finlandës “Veikkausliiga”, ndërsa ka realizuar 23 gola. Në vitin 2011 me Lahtin luajti në kategorinë e dytë, ndërsa shënoi gjashtë gola në 12 ndeshje. Ai thotë se ka zgjedhur Turqinë që të bëhet futbollist më i mirë. “Nga Finlanda largohem me 100 ndeshje në kategorinë e parë. Dua të arrij më shumë dhe të bëhem futbollist më i mirë.

Në Turqi mentaliteti është i njëjtë me atë në Kosovë dhe besoj se për mua do të jetë më lehtë që të luajë atje”, ka thënë Shala. Ai kishte disa paraqitje për U-19 të Finlandës. Në edicionin e vitit 2012 shënoi shtatë gola në 30 ndeshje për Lahtin. Ishte sulmuesi kryesor i skuadrës. Tavsanli po lufton për ekzistencë në kategorinë e dytë turke.