Drejt Vlorës së Pavarësisë, 300 kalorës nga Kosova

Prishtinë – 300 kalorës nga Kosova, njësoj si para 100 vjetëve, do të udhëtojnë drejt Vlorës për të marrë pjesë në shënimin e 100-vjetorit të Pavarësisë së Shqipërisë.

Pas iniciativave të shumta grupore e individuale, tashmë kjo do të bëhet nën ombrellën e Unionit të Kritikëve dhe Shkrimtarëve Shqiptarë.

Sipas njërit nga organizatorët e këtij Unioni, Begzad Baliu, këta kalorës do të nisën nga vende të ndryshme të Kosovës për t’u bashkuar në Vlorë. Nisja zyrtare do të bëhet nga Qendra e Prishtinës, për të arritur në Vlorë në mëngjesin e 28 Nëntorit, ku do të rikonstruktojnë aktin e takimit të Ismajl Qemajlit me Isa Boletinin, bashkë me artistët e Teatrit të Vlorës.

Sipas Balit, ky marsh është bërë në pajtim me Programin Qeveritar të Bashkisë së Vlorës, me të cilin kalorësve nga Kosova u është ndarë enkas një pjesë e kohës nga ky program.