Dorëheqjet në AKI, shqetësuese

Deputetë dhe ekspertë të sigurisë zhvillimet të cilat kanë ndodhur në Agjencinë Kosovare të Inteligjencës, i kanë cilësuar si shqetësuese për shkak të ndjeshmërisë që e ka ky institucion i rëndësishëm shtetëror.

Eksperti i sigurisë, Naim Maloku, theksoi për Telegrafin se dorëheqjet e fundit në AKI janë shqetësuese.

Ai mendon se duhet të sqarohen arsyet e dorëheqjeve sepse kemi të bëjmë me një institucion të rëndësishëm shtetëror. Sipas tij, mund të ndodh që brenda këtij institucioni ka pasur mosmarrëveshjeve kjo ka rezultuar me dorëheqjen e anëtarëve të saj.

“Mendoj që punën kryesore në këtë drejtim e ka Komisioni për Siguri dhe brenda anëtarëve të komisionit duhet të trajtohen seriozisht këto probleme. Nuk është e domosdoshme që mbledhjet të jenë të hapura për publikun, me rëndësi është që ky mekanizëm ta ketë informacionin e mjaftueshëm për zhvillimet në inteligjencën kosovare”, ka thënë Maloku për Telegrafin.

Në anën tjetër, kryetari i Komisionit për Siguri, Florin Krasniqi, pas takimit të komisionit, ka deklaruar për media se dorëheqjet e fundit në AKI të janë shqetësuese. Sipas tij, nuk do të lejohet që AKI të bëhet agjenci e dostave të askujt, duke punuar shumë në bërjen e një shteti të fuqishëm.

Ndërsa, deputeti i Partisë Demokratike të Kosovës, Fatmir Xhelili, njëherësh anëtar i Komisionit për Siguri, nuk ka dashur të prononcohet rreth zhvillimeve të fundit në AKI.

Deri tani në AKI, kanë dhënë dorëheqje tre zyrtarë. /Telegrafi/