Dialogu me të shantazhuarit e zbeh Republikën

Bisedimet Kosovë-Serbi, me pak efekte për Kosovën. Negociatorët kosovarë tregohen të papërgjegjshëm.

Analistë dhe opozitarë vlerësojnë se kjo po ndodh edhe sot nga kjo garniturë politike e korruptuar dhe e shantazhuar, që po e bën shtetin jofunksional, duke bërë kompromise të dëmshme me palën serbe në disfavor të vendit.

Rezultatet e fundit të dialogut në mes të Prishtinës dhe Beogradit në Bruksel dhe marrëveshjet e arritura deri më tani në këtë proces, me shumë lëshime të bëra nga pala kosovare, kritikohen ashpër nga analistë politikë dhe përfaqësues të opozitës. “Zgjidhjet që po jep dialogu i Brukselit po e degjenerojnë Republikën, duke e shndërruar Kosovën në një Bosnjë të dytë. Ky proces po udhëhiqet nga liderë që lëshimet ndaj Serbisë i shohin si monedhën e vetme këmbyese, që ua mundëson mbijetesën politike. Në Bruksel nuk po mbrohet interesi i Kosovës, por interesi personal i duos Thaçi-Mustafa. Ekipet negociatore me përgatitje mediokre janë tregues i heqjes dorë të udhëheqësisë së vendit nga përgjegjësia për ta mbrojtur interesin e vendit”, tha Ylli Hoxha nga lëvizja ‘Vetëvendosje’.

Edhe anëtari i Komisionit për punë të jashtme në Kuvendin e Kosovës, Zafir Berisha, thotë se në këtë proces negociator dhe rezultatet e tij, pala kosovare e Qeverisë ‘Mustafa’ nuk ka performuar hiç më mirë se ekipet e dështuara negociatore, që kishte dërguar atje në mandatin e kaluar ish-kryeministri Thaçi, madje edhe duke marrë pjesë personalisht në takimet kyçe të vendimmarrjes me koncesione të dëmshme për vendin./kosova sot/