Dëshmi e vitit 1991, për armatosjen e popullatës jo shqiptare të Komunës së Gjilanit

Gjilan – Se iniciativa për armatosjen e popullsisë joshqiptare të Komunës së Gjilanit, kishte filluar mjaft herët, flitet edhe në dokumentin zyrtar të përgatitur nga Shoqata e Luftëtareve të LNÇJ-së, të kësaj komune, me nr. 01-18 të datës 29.07.1991, drejtuar organeve kompetente komunale, për shpërndarjen institucionale të armatimit, popullatës serbe e malazeze dhe asaj joshqiptare të komunës thotë historiani Aliriza Selmani.

Sipas historianit të njohur Aliriza Selmani kjo iniciativë e iniciuar nga organet e larta shtetërore, për të filluar armatosjen institucionale të popullatës serbo-malazeze e të tjerë joshqiptare, gjoja për “mbrojtje”, nga shqiptarët, kishte për synim krijimin e një atmosferë pasigurie ndër masat shqiptare dhe njëherit përgatitjen që në momentin e duhur të përdoreshin kundër shqiptarëve të pambrojtur dhe të paarmatosur.

Srba Ristiq – kryetari i Shoqatës së Luftëtarëve të LNÇJ-së në komunën e Gjilanit, në emër të Kryesisë së kësaj shoqate, më 29.07.1991, i drejtohet Këshillit Ekzekutiv dhe organeve kompetente të Komunës së Gjilanit, me kërkesë që, urgjentisht të bëhet armatosja e popullatës serbe, malazeze dhe asaj joshqiptare të komunës. Kjo iniciativë ishte mare siç thuhet, me arsyetimin se pas një analize të situatës politike dhe të sigurisë në komunë e në Kosovë, kryesia e kësaj shoqate erdhi në përfundim se situata është kritike dhe ekziston rreziku i shkallëzimit të konfliktit, andaj për sigurinë e popullatës serbo-malazeze dhe jo shqiptare (bëhet fjalë, për romë-të besuarit, për qëllimet e tyre) dhe mbrojtjen e tyre nga shqiptarët, bien vendimin që t’i drejtohet Këshillit Ekzekutiv dhe organeve kompetente të komunës, me kërkesë për armatimin e tyre, me anën e të cilave do ti kundërviheshin sulmeve të shqiptarëve.

Më tej në këtë shkresë thuhet, se vendimi për shpërndarjen e armatimit, ishte marrë pas kërkesave të shtruara kësaj kryesie, nga ana e luftëtarëve të LNÇ-së dhe nga ana e qytetarëve serbo-malazez të komunës.

Kopjet e kësaj kërkesë iu dorëzuan:
1. Sekretariatit për Mbrojtje Popullore te Komunës së Gjilanit dhe
2. Këshillit komunal te Sekretariatit te Punëve të Brendshme (SPB-së) në Gjilan.
Siç dihet shpërndarja e armatimit popullatës serbe e malazeze të komunës, i është dërguar me kamionë ushtarakë, shtëpi për shtëpi, si në shtëpitë serbe të qytetit ashtu edhe në fshatra. Këto armë mbase edhe tani ndodhen në ato shtëpi ka thënë Selmani./rajonipress/