Demolli: Nuk jam kandidat për kryetar të LDK-së

Pas zgjedhjeve të fundit lokale në LDK janë hapur përsëri debate për një Kuvend zgjedhor. Madje është përmendur edhe emri i Haki Demollit si kandidat “konsensual” për kryetar të LDK-së. Por, Demolli ka mohuar se do të jetë kandidat për kryetar të LDK-së.

Demolli ka thënë se “LDK-ja më këtë kryesi dhe më këtë udhëheqje, me këtë frymë të punës së vet do të dalë shumë e fuqishme dhe do të jetë fituese e garës së vitit 2014”.

Ai ka pranuar se në media është përfolur emri i tij, por edhe për emra të tjerë, si kandidat të mundshëm për kryetar të partisë.

“Për mua është me rëndësi që LDK-ja të tejkalojë plasaritjet eventuale që mund të paraqiten në fazat e zhvillimit të partive politike, që të jetë sa më e fortë në zgjedhjet që do të mbahen gjatë këtij viti dhe që LDK-ja do të dalë e para dhe kështu do ta përmbysë këtë koalicion qeverisës që është përcjellë me një varg aferash, me një varg shkeljesh e parregullsish për të cilat ka qenë e përfolur edhe çështja e krimit, korrupsionit dhe forma të tjera kriminale”, ka thënë Demolli për “Botapress”.

Demolli ka besim në udhëheqjen e partisë nga Isa Mustafa, duke thënë se “besoj se LDK-ja në këtë frymë të punës së vet do të dalë shumë e fuqishme dhe do të jetë fituese e garës së vitit 2014. Me këtë kryesi, me këtë udhëheqësi, LDK-ja do të dalë e para”. /Botapress/Telegrafi/