Demarkacioni, jo në Arbitrazh

Shefi i deputetëve të “Vetëvendosjes”, Glauk Konjufca, gjatë një interviste për “Zërin” thotë se demarkacioni nuk ka nevojë të shkojë në Arbitrazh, pasi që, sipas tij, po i falet tokë Malit të Zi. Ai ka shkuar edhe më larg duke e krahasuar Murat Mehën me figurën e Esat Pashë Toptanit.

Demarkacioni nuk duhet të dërgohet në Arbitrazh, por ka nevojë që t’i tregohet Murat Mehës se shënjimi i kufirit me Malin e Zi është gabim dhe kjo ka ndodhur pasi që ka punuar me direktiva të Hashim Thaçit.

Kështu ka deklaruar gjatë një interviste për gazetën “Zëri” shefi i grupit parlamentar të Lëvizjes “Vetëvendosje”, Glauk Konjufca, duke shtuar se nuk do ta pengojnë Mehën derisa flet në tryezën e sotme, por nuk do të pranohet si e drejtë puna e tij.

Konjufca, madje, thotë se Meha e di mirë ku është kufiri, meqë, siç ka thënë ai, është njeri i fushës, por këtë po e bën nga presioni politik.

Shefi i deputetëve të “Vetëvendosjes” ka shkuar edhe më larg ku nipin e Tahir Mehës, Muratin, e ka krahasuar me figurën e Esat Pashë Toptanit. “Esat Pasha para se ta bëjë aktin e tradhtisë ka zhvilluar disa beteja të suksesshme për mbrojtjen e Shqipërisë. Do të thotë njeriu në disa periudha të caktuara mund ta mbrojë kombin e vet dhe mund të jetë me kontribute të pakontestueshme për kombin, por gjatë rrugëtimit në histori të ndryshojë. Dhe nuk kam kurrfarë dyshimi se i tillë është edhe Murat Meha”, ka pohuar Konjufca./zeri/