Daku: Për veteran lufte kanë aplikuar edhe struktura të UDB-së

Gjilan – Ahmet Daku kryetar i shoqatës së veteranëve të luftës në Gjilan tha për rajonipress se deri tani kanë aplikuar mbi 1200 veta. Sipas tij në mesin e atyre që kanë aplikuar ka edhe struktura të UDB-së dhe njerëz që luftën e kanë parë vetëm nga distanca.

Ecuria e aplikimeve për veteran të luftës së UÇK – së, në degën e Gjilanit, ka ngjallur interesim të madh , por njëkohësisht edhe reagime tek ushtarët e vërtetë. Ahmet Daku kryetar i veteranëve të luftës në Gjilan tha për rajonipress se deri tani aplikacionet i kanë marrë mbi 1400 veta kurse i kanë dorëzuar 1200.

“Interesimi ka qenë jashtëzakonisht i madh si nga veteranët ashtu edhe nga grupacionet e ndryshme të qytetarëve të Komunës së Gjilanit. Vlen të theksohet se kanë aplikuar edhe një pjesë e strukturave UDB – së, dhe ministrisë se famshme që kanë luftuar nga Gjermania dhe anasjelltas” tha Daku.

Daku tha se kjo ka qenë një fyerje e rëndë për ne si bartës të këtij procesi. “Nuk e kam kuptuar se si nuk kanë pasur mëshirë të vijnë e të aplikojnë këto struktura udbashe kur dihet se sa i kanë bërë dëm atdheut, popullit ku asnjëherë nuk dolën së paku publikisht e t`i kërkojnë falje këtij populli” shprehet i revoltuar Daku.

Ai thotë se edhe ata të cilët kanë marr përgjegjësi për t`i dal në mbrojtje popullit dhe atdheut, kanë ikur jashtë vendit dhe kanë luftuar në vende të ndryshme si në Shqipëri, Itali Gjermani besa edhe në SHBA. “Këta njerëz i kanë shfrytëzuar taksat e familjeve tona , të popullit tim për t`i dal zot atdheut, e në fakt kjo kategori që sot kërkon të marrë statusin e veteranëve ato mjete i kanë shfrytëzuar në ushqime luksoze për familjet e tyre, hotele dhe paga të majme” tha Daku./rajonipress/