Daka paralajmëron vështirësi nëse zgjedhjet mbahen shpejt

“Ne jemi të përgatitur për zgjedhje të parakohshme sepse çdo palë zgjedhje që mbahen para muajit dhjetor, janë të parakohshme. Por, nëse reforma mbaron shpejt, është një sfidë e madhe për ne. Na duhet një kohë e caktuar sepse na duhet kohë për trajnimin e stafit, harmonizimin e legjislacionit dhe shumë gjëra tjera teknike. Është çështje sfiduese”, tha për RTK, Kryetarja e KQZ, Valdete Daka.

Kryetarja e Komisionit Qendror të Zgjedhjeve, Valdete Daka, paralajmëroi vështirësi serioze për institucionin që ajo udhëheq, nëse reforma zgjedhore miratohet dhe zgjedhjet shpallen shpejt.

Sipas saj, ajo dhe institucioni që ajo drejton nuk ka indikacione për datën se kur mund të mbahen këto zgjedhje.

“Të gjitha janë çështje politike. Neve nga intereson data e zgjedhjeve për të qenë sa më të përgatitur”, tha tutje Daka.

“Ndoshta do të ketë ndryshim të vogël teknik, por jo ndryshim substancial”, u përgjigj ajo në pyetjen se sa do të jetë e thellë reforma zgjedhore.