Çmimin “Pena e Flakës” e fitoi Mimoza Erebara nga Tirana

Gjilan – Juria në përbërje Nehat Sopaj, Ana Kove dhe Linditë Ramushi, çmimin e Orës letrare “Pena e Flakës” ia ndau poetes nga Tirana, Mimoza Erebara, për poezinë “Uni im në vetën e tretë”.

Me Orën e madhe letrare dhe shpalljen e rezultateve të konkursit letrar shërbyes, të premten në Gjilan është përmbyllur “Pena e Flakës” si pjesë e manifestimit “Flaka e Janarit”, që këtu mbahet në nderim të dëshmorëve të kombit.

Në orën e madhe letrare, me poezitë e tyre të pabotuara më parë, janë prezantuar mbi 50 krijues nga Kosova, Shqipëria, Maqedonia, Lugina e Preshevës dhe diaspora. Veçmas ka qenë i madh kësaj here numri i poetëve nga Shqipëria, të cilët e kanë begatuar orën letrare.

Juria në përbërje Nehat Sopaj, Ana Kove dhe Linditë Ramushi, çmimin e Orës letrare “Pena e Flakës” ia ndau poetes nga Tirana, Mimoza Erebara, për poezinë “Uni im në vetën e tretë”.

Ndërkohë, edhe juria e konkursit shpërblyes, në përbërje Musa Ramadani, Zejnepe Alili-Rexhepi e Nexhat Rexha i ka komunikuar vendimin e saj për punimet e shpërblyera në poezi dhe prozë.

Zejnepe Alili-Rexhepi tha se konkursit i kanë arritur 276 punime, në të dy gjinitë. Juria ka ndarë këto çmime në poezi: Vendi i parë – poezia me titull “Mbrëmje pavarësie” (pa shifër), vendin e dytë e ndanë poezitë “Hiri” (pa shifër) dhe “Vjeshta e një gruaje” (shifra: 2463), vendi i tretë – “Një femër” (shifra: 13).

Edhe në prozë, juria ka ndarë tri çmime: Vendi i parë – “Shkrimi” (shifra: Liria për ty), vendi i dytë u nda për dy tregime – Vdekja banale (shifra: Miku i vjetër) dhe “Përballë jetës” (shifra: Hylli), vendi i tretë – “Kalorësi i pestë” )shifra: Sigmund frend).

Nexhat Rexha, anëtar i jurisë, tha se kanë qenë unanim në vendime.

Punimet e shpërblyera duhet të deshifrohen me kopjen e katërt para jurisë vlerësuese.

Në përputhje me rregullat e konkursit, juria ka përzgjedhur edhe një numër të punimeve në poezi e prozë, të cilat do t`i propozohen për botim revistës “Agmia”./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).