Çmimet e kurdisura për vjedhje legale institucionale

Nga Demir Krasniqi – Po i shikove me vëmendje programet ekonomike propagandistike nëpër mediumet tona publike elektronike , në veçanti , po qe se koncentrohesh tek çmimet e shitjes së artikujve të ndryshëm , duke filluar prej atyre ushqimore e deri tek artikujt e standardeve më të larta të jetës luksoze , atëherë konsumatori i thjeshtë që ka logjikën e shëndoshë dhe që rron me të ardhura modeste , nuk ka se si të mos irritohet , madje edhe të nervozohet ?!

Me vite të tëra, në vazhdimësi, nëpër mediumet tona reklamohen mallra e artikuj të ndryshëm si nevoja jetësore , me çmime të kurdisura për vjedhje legale institucionale të konsumatorit, pa u hetuar fare !

Se është vërtetë kështu, më së miri dëshmojnë dhe argumentojnë shifrat e çmimeve duke filluar prej A-së deri në ZH , ku secila prej tyre përfundon me shifrën 99 cent !P.sh. 2.99 cent, 40.99 cent, 449.99 cent …etj. etj.

Me aplikimin e këtij sistemi të çmimeve nëpër shitoret e vendit tonë, konsumatori mashtrohet në dy mënyra :
Konsumatori në shikim të parë të shifrës së çmimit, formon bindjen se këto çmime qenkan të volitshme dhe të lira !

Me rastin e blerjeve të artikujve të ndryshëm , konsumatori i thjeshtë dhe modest, do të bien viktimë e vjedhjes legale nga ana e shitësve , nga fakti se shumë pak prej tyre do t’ua kthejnë konsumatorëve kusurin pre 1 (një) centi , apo më shumë centësh ?!
Kur kihet parasysh mentaliteti dhe modestia e konsumatorëve nga shtresa e gjerë popullore , atëherë rezultati del se një pjesë e madhe e tyre nuk ua kërkojnë shitësve kthimin e kusurit prej 1 centi , duke menduar se do të koriten me shitësit ?!

Kur të llogariten përfundimisht këto kusure , shifra e tyre për konsumatorët nuk na del aq alarmante , mirëpo kur të llogaritet bilanci i pazareve të përgjithshme ditore , nga mijëra konsumatorë dhe nga mijëra artikuj të shitur , atë herë llogaria përfundimtare e vjedhjes së 1 centi nga çdo konsumatorë , na jep një shifër alarmante të hajnisë legale institucionale !

Pa dyshim, se me këso lloj çmimesh dhe mashtrimesh , manipulojnë të gjitha qendrat tregtare të Kosovës, por ato që mbajnë primatin e servimit të këtyre çmimeve , pa dyshim janë qendrat tregtare të ETC-së (Ekonomski Trgocaçki Centar) gjithandej Kosovës !

Pra , mendojmë se është koha e fundit që konsumatorët tanë t’i hapin sytë mirë se çfarë po blejnë dhe çfarë po paguajnë , kurse organet tona institucionale t’i monitorojnë pak më mirë këto çmime, mashtrime dhe vjedhje të konsumatorëve !

Gjilan, më 01. 04. 2014.