BIK-u i hap rrugë Tërnavës, “siguron” Hamitin

Bashkësia Islame e Kosovës ka mbajtur Kuvendin e saj, në të cilin ka bërë ndryshimin e kushtetutës në pjesën e mandatit të myftiut. Këto ndryshime do t’ia mundësojnë myftiut Naim Tërnava që të kandidojë edhe për një mandat për këtë post, pasi kushtetuta e mëhershme nuk ia lejonte një gjë të tillë.

Ai në këtë garë pritet të sfidohet nga ish-kryetari i Kuvendit të BIK-ut, Xhabir Hamiti, i cili u shkarkua nga përkrahësit e Tërnavës gjatë mbledhjes së Kuvendit, javën e kaluar.

Me të filluar mbledhja, e cila është zhvilluar gjatë gjithë kohës me dyer të mbyllura, anëtarë të Kuvendit të BIK-ut kanë votuar për zgjedhjen e kryetarit të Kuvendit, pas shkarkimit të Xhabir Hamitit.

Në këtë pozitë është zgjedhur Fadil Hasani, i cili mbante postin e nënkryetarit, derisa vendin e tij e ka zënë Agim Hyseni. Zgjedhja e tyre ka ndodhur pavarësisht faktit se në tetor, kur janë zgjedhjet e rregullta, pos për myftiun, mandati përfundon edhe për kryetarin dhe nënkryetarin.(Tribuna).