Berisha më i mirë se Marchetti, ja faktet

Etrit Berisha deri më tani është treguar më i suksesshëm se portieri i parë i Lazios, Federico Marchetti.Portieri i Kombëtares shqiptare, Etrit Berisha po tregohet më i suksesshëm se numri një i Lazios, Federico Marchetti, i cili aktualisht është i lënduar.

Sipas “La Lazio Siamo Noi”, kur luan Berisha, skuadra arrin të shfaqet më mirë dhe këtë e thonë statistikat. Në 16 ndeshjet e luajtura nga Marchetti, Lacio ka një mesatare prej 1.13 pikësh për ndeshje me 22 gola të pësuar, që, sipas një mesatareje, përllogaritet në 1.38 të tillë për çdo takim.

Me portierin titullar të Piolit, Lacio është mundur tetë herë dhe ka 3 barazime e 5 fitore. Statistika që Berisha “i hedh në erë”. Gardiani kuqezi numëron 15 sfida me 2.2 pikë të siguruara për ndeshje, 17 gola të pësuar.

Në total, me shqiptarin në portë, Lacio numëron 10 fitore, 3 barazime dhe 2 humbje. Në vijim të analizës, “La Lazio Siamo Noi” shton se gafa e bërë në Firence e penalizon portierin shqiptar tek i cili klubi vazhdon të mos besojë plotësisht.

“Berisha jep maksimumin kur luan titullar si me Kombëtaren, ashtu edhe me Lacion. Ai dëshiron më shumë hapësira, pasi do të luajë edhe në EURO 2016 me Shqipërinë dhe po studion mundësinë e një largimi të mundshëm”, shton faqja e specializuar që e lidh të ardhmen e portierit prishtinas.