Bashkatdhetari Ridvan Asllani jep 6000 euro për 10 student

Gjilan – Ridvan Asllani bashkatdhetar në Zvicër i ka ndarë hiq më pak se 6000 euro për 10 student të dalluar të cilët do të marrin nga 600 euro bursë vjetore. Bujar Nevzati drejtor i arsimit tha se gjesti i këtij mërgimtari është shumë domethënës.

Ridvan Asllani nga Malisheva e Gjilanit, aktualisht mërgimtar në Zvicër nuk ka ngurruar asnjëherë që të ndihmojë kategoritë e të gjitha shtresave, jo vetëm në Gjilan. Ai njihet si humanist i madh edhe në Zvicër e kudo që ka pasur nevojë të jap kontributin e tij.

Kësaj radhe Ridvan Asllani nuk ka ngurruar që për 10 studentët e dalluar të ndajë hiq më pak se 6000 euro. Bujar Nevzati drejtor i arsimit tha për rajonipress se gjesti i këtij mërgimtari është shumë domethënës, në veçanti kur dihet fakti se studentët e dalluar ka pak mundësi të ndihmohen e stimulohen nga institucionet.

Nevzati tha se këta 10 student do të marrin në formë të bursës nga 600 euro brenda vitit kurse të hollat tashmë Ridvan Asllani i ka derdhur në buxhetin e drejtorisë së arsimit.

Nevzati tha se edhe drejtoria e arsimit ka ndarë 40 bursa për studentët që studiojnë jashtë Gjilanit dhe 30 të tjera që studiojnë në Gjilan sikurse do të ndahen edhe 20 mirënjohje për studentët e dalluar e që e kanë vlerën e 200 eurove./rajonipress/