Barazia gjinore si standard ligjor dhe demokratik në qeverisjen e Gjilanit

Gjilan – Kryetari i Komunës së Gjilanit ka njoftuar për mbajtjen e mbledhjes së parë të qeverisjes komunale dhe ka prezantuar një pjesë të kabinetit të ri qeverisës. Megjithatë, përbërja aktuale e kabinetit ngre shqetësime serioze lidhur me respektimin e parimit të barazisë gjinore. Me vetëm dy gra në pozita drejtuese, përfaqësimi gjinor mbetet dukshëm nën standardin e përcaktuar nga legjislacioni në fuqi, i cili synon përfaqësim të balancuar të të dy gjinive në institucionet publike.

Barazia gjinore nuk është çështje e vullnetit politik, por obligim ligjor dhe standard themelor demokratik. Mosrespektimi i këtij parimi cenon frymën e gjithëpërfshirjes dhe ngre pikëpyetje për përputhshmërinë e emërimeve me kornizën ligjore në fuqi. Qeverisja e mirë nuk matet vetëm me kompletimin e kabinetit, por me respektimin e ligjeve që garantojnë përfaqësim të drejtë dhe të barabartë.

Institucionet publike duhet të jenë shembull në zbatimin e ligjit dhe jo të krijojnë përjashtime prej tij. Në këtë kuptim, presim që përbërja e kabinetit të rishqyrtohet në funksion të respektimit të standardeve të barazisë gjinore, me qëllim forcimin e besimit të qytetarëve në qeverisjen lokale dhe promovimin e një qeverisjeje gjithëpërfshirëse./rajonipress/