Azemi realizon dy gola në derbin e Bundesliga 2

Ilir Azemi ka gjetur përsëri rrugën e golit. Kësaj radhe, sulmuesi kosovar realizoi dy gola në barazimin 2:2 të Greuther Furthit në udhëtim te Paderborni.

Ilir Azemi përsëri në cak. Sulmuesi kosovar ka vazhduar formën e tij të mirë të golave duke shënuar dy të tillë në barazimin 2:2 të Greuther Furthit në udhëtim te Paderborni.

Azemi ishte në top-formë duke i nxjerrë skuadrës së tij një pikë të vlefshme në udhëtim, me golat e realizuar në minutat 59 dhe 90.

Ai luajti 90 minuta në këtë sfidë, sikurse edhe bashkëvendësi i tij, Mërgim Mavraj, duke u ndëshkuar me karton të verdhë në minutën e 59-të.

Te vendasit, tërë lojën luajti mesfushori, Alban Meha, por për dallim nga Azemi, ai nuk arriti të realizojë gol në këtë sfidë.

Ky ishte goli i nëntë i Ilirit këtë edicion në ligën e dytë të futbollit gjerman.

Me këtë barazim, Furthi tani ka 53 pikë në pozitën e dytë në Bundesliga 2, teksa Padeborni ka një pikë më pak në pozitën e tretë.