Apelon Haziri: Virusi të merr me vete nëse nuk je i kujdesshëm

Gjilan – Kryetari i Komunës së Gjilanit, Lutfi Haziri, ka apeluar qytetarët që të jenë të kujdesshëm për ta parandaluar përhapjen e COVID-19, duke thënë se virusi të merr me vete nëse nuk ke kujdes.

Këto komente Haziri i bëri në takimin e Komitetit të Gjilanit për menaxhimin dhe parandalimin e përhapjes së COVID-19, pas 15 rasteve të reja pozitive në këtë komunë.

“Për pesë muaj, kemi shënuar 804 raste pozitive në total, janë shëruar 604 persona, raste aktive janë 169, të hospitalizuar i kemi 48 persona, mostra në pritje janë 37, derisa fatkeqësisht 31 gjilanas e kanë humbur betejën me COVID-19. Ju lutem shumë, kujdesuni e mos u bëni për kujdes intensiv. Virusi nuk të pyet kush je, të merr me vetë nëse nuk je i kujdesshëm”, ka thënë Haziri./rajonipress/