Anketa: Pa simbole, s’ka vota!

Disa nga qytetarët e Kosovës të anketuar nga gazeta “Zëri” kanë thënë se nuk do të votojnë në zgjedhjet lokale të 3 nëntorit nëse nuk ka simbole shtetërore në fletëvotime. Ata shprehen të bindur se e vetmja formë e pranueshme për ta do të ishte që fletëvotimet e zgjedhjeve të nëntorit të jenë me simbolet shtetërore të Republikës së Kosovës dhe të organizuara në bazë të ligjeve të Kosovës.

Enver Latifi, një qytetar nga Prishtina, thotë se nuk do të votojë nëse sërish i bëhen favore Serbisë. “Nëse nuk ka simbole shtetërore në fletëvotime unë nuk do të votoj. Mjaft i janë bërë favore Serbisë, tani është koha që ajo ta pranojë realitetin. Edhe Qeveria jonë duhet të jetë më këmbëngulëse në synimet e saj”, ka thënë Latifi.

Edhe Fatime Krasniqi ka thënë se nuk e ka ndërmjet të votojë në rast se nuk ka simbole shtetërore të Kosovës në fletëvotime. “Duhet të dihet se në cilin shtet po votojmë, prandaj gjithsesi duhet të ketë simbole shtetërore, përndryshe nuk do të votojmë”, ka thënë ajo.

Në të njëjtën mënyrë janë shprehur edhe qytetarët tjerë. Për më tepër ata kanë thënë se nuk duhet t’ua plotësojmë të gjitha dëshirat minoritetit serb, pasi që ata tanimë gëzojnë të gjitha të drejtat e tyre, madje më shumë se çdo minoritet tjetër në vendet evropiane.

“Mendoj që simbolet shtetërore as që duhet të diskutohen, ato duhet të jenë në fletëvotime. Nuk ka arsye që të mos jenë, pa to nuk votoj”, ka thënë Gresa Pajaziti, qytetare e Prishtinës.(“Zëri”)