Aliti: Komplimente djemve të ri, kanë bërë një punë fantastike

Kosova u paraqit sot në ndeshjen ndaj Izraelit me mungesa të theksura, veçanërisht në fazën e mbrojtjes ku pati mungesa si Amir Rrahmani dhe Mërgim Vojvoda.

Në mungesë të tyre, përzgjedhësi Primozh Gliha kishte vendosur t’i kthente sytë tek Superliga e Kosovës duke ftuar Lumbardh Dellovën dhe Ilir Krasniqin.

Sipas Alitit të dy e kanë kaluar me sukses këtë sfidë dhe i ka përgëzuar për paraqitjen në fushë.

“I takon një urim dhe një kompliment djemve të ri që kanë ardhur për herë të parë. Kanë bërë punë fantastike. Është dashur t’i dirigjojë dy lojtarët tjerë të mbrojtjes. Komplimente për ta, kanë bërë lojë fantastike”, ka thënë fillimisht Aliti.

Tutje, ai pati disa fjalë edhe për terrenin ku u zhvillua ndeshja, ku tha se karakteri i ekipit shihet kur luajnë në këso kushtesh.

“Terreni ishte i njëjtë për të dy palët. Nuk kemi rrezikuar shumë dhe e kemi ditur që kemi Vedatin përpara. Në këtë terren shihet karakteri i ekipit dhe këtë e dëshmuam. Luftuam për njëri-tjetrin”, shtoi Aliti.

Për fund ai tha se Kosova është e gatshme edhe për sfidën ndaj Zvicrës, e cila do të luhet me datë 18 nëntor./Telegrafi/