Alban Hyseni shpreh ngushëllime për tragjedinë në Demiraj: Kërkon zbardhjen e plotë të rrethanave të rastit

Gjilan – Kryetari i Komunës së Gjilanit, Alban Hyseni, ka reaguar pas ngjarjes së rëndë të ndodhur në fshatin Demiraj, ku humbën jetën dy persona, duke shprehur ngushëllimet më të sinqerta për familjarët dhe të afërmit e viktimave.

Përmes një postimi publik, Hyseni e ka cilësuar këtë ngjarje si një tragjedi që ka tronditur komunitetin dhe ka prekur thellë qytetarët e Gjilanit.

Ai ka theksuar se në këto momente të vështira, Komuna e Gjilanit ndan dhimbjen me familjarët, duke u shprehur solidaritetin institucional dhe njerëzor përballë kësaj humbjeje të rëndë.

Njëkohësisht, kryetari Hyseni ka kërkuar që organet kompetente të rendit dhe të drejtësisë të angazhohen me përkushtim të plotë për zbardhjen e të gjitha rrethanave të ngjarjes, e cila ende nuk është sqaruar në tërësi.

Ai ka nënvizuar rëndësinë e hetimit profesional dhe të plotë, në mënyrë që të ndriçohet e vërteta lidhur me këtë rast tragjik.

Ngjarja në Demiraj ka nxitur reagime dhe pikëllim në komunitetin e Gjilanit, ndërsa institucionet e rendit dhe të drejtësisë po vazhdojnë procedurat hetimore për sqarimin e plotë të saj.

Në emër të Komunës së Gjilanit, Alban Hyseni u ka shprehur ngushëllimet më të sinqerta familjarëve, duke ndarë dhimbjen me ta në këto momente të rënda./rajonipress/