Profesori kërkon 200 euro ryshfet për një provim ​

Sokol Domniku, profesor i rregullt në Fakultetin e Biznesit në Universitetin “Haxhi Zeka” në Pejë, po i shet notat nga 200 euro.

Për këtë ai ka angazhuar edhe Sokol Nikqin, student i tij, i cili luan rolin e ndërmjetësuesit mes studentëve dhe profesorit, shkruan Koha Ditore.

Që të dy janë arrestuar të shtunën, pasi që ia kishin bërë ofertën “personit të gabuar”. Ata janë zënë në flagrancë, duke bërë një shkelje të tillë, ngase studenti F.T. nga ky Universitet kishte vendosur ta denonconte në polici kolegun dhe profesorin e tij dhe të bashkëpunonte me organet e rendit.

Prokurorja e këtij rasti nga Prokuroria Themelore në Pejë, Sahide Gashi, ka thënë për gazetën se fillimisht ka pranuar disa informata dhe se në bazë të tyre ka lëshuar urdhëresa për aplikim të masave të fshehta në këtë rast.