Mustafa: Fitorja e LDK-së e orienton Kosovën kah Evropa
RajoniPress
23:44, 23 Maj, 2014
Kryetari i Lidhjes Demokratike të Kosovës (LDK) dhe kandidati i saj për kryeministër, Isa Mustafa, u ka thënë të premten në mbrëmje strukturave të degës së dytë të LDK-së dhe aktivistëve të saj se e kanë obligim të angazhohen për t’i njoftuar sa më shumë qytetarë me programin qeverisës të LDK-së dhe t’i bindin ata që fitorja e LDK-së në zgjedhjet e 8 qershorit është jetike për orientimin e vendit tonë kah Evropa.
“Me një fitore të thellë në këto zgjedhje, LDK do të dëshmojë se është partia e parë politike në Kosovë, që përfaqëson më së miri interesat e qytetarëve të Kosovës dhe që do ta orientojë Kosovën kah zhillimi dhe integrimi në familjen euro-atlantike”, ka thënë Mustafa, njofton kumtesa nga LDK.
Mustafa ka theksuar se angazhimi LDK-së do ta kthejë suksesin e saj, do ta pamundësojë votën e gabuar, siç ka ndodhur kur është votuar qeverisja në largim dhe siç ka ndodhur në Prishtinë, në zgjedhjet e fundit.
“Kemi një program që ofron zgjidhje për secilin problem. Ofron zgjidhje për punësimin, zhvillimin ekonomik, uljen e varfërisë, shkollimin më të mirë, për shëndetësi të mirë e efikase, forcimin e shtetit ligjor që të mos na ndodhin skena të tilla që tregojnë dështimin e shtetit”, ka thënë Mustafa, sipas të cilit, dështimet e shtetit do të përfundojnë me dështimin e Hashim Thaçit.
Ai ka thënë se më 8 qershor, qytetarët e Kosovës, votuesit tradicionalë të LDK-së, nuk duhet të mendojnë më se ka kush voton dhe të mos dalin në votime. “Ne duhet të dalim të gjithë të votojmë. Të tregojmë se jemi partia më e madhe në Kosovë, jemi partia e Presidentit Ibrahim Rugova, e fitoreve dhe që Kosovës ia kthen demokracinë, barazinë dhe lirinë dhe shtetin e orienton Evropa. Nuk do të arrijmë këtë, nëse kësaj radhe nuk fiton LDK. Objektiv yni është fitorja e LDK, sepse kështu fitojnë të gjithë qytetarët”, ka thënë Mustafa.
Kryetari i degës së dytrë të LDK-së, Mustafë Krasniqi, ka theksuar se 54 është numri i fitores së LDK-së, të cilës do t’i ndihmojë Dega e dytë e LDK-së në Prishtinë, e cila është e mobilizuar dhe do të punojë për t’i bashkuar sa më shumë qytetarë rreth platformës qeverisëse të LDK-së.
© KOHA.net
