Kosova s’ka kryeministër. Është veç perceptim

Nga Imer Mushkolaj – Për kryeministrin mund të jenë veç perceptim korrupsioni, aferat korruptive BMW me djemtë e tij dhe aferat me terminalet doganore. Për qytetarët është veç perceptim se ata kanë kryeministër. Një kryeministër si Isa Mustafa, pasiv e i pafuqishëm, frikacak e arrogant, nuk i duhet askujt.

Një ditë pasi zyrtarë qeveritarë u krenuan se Kosova ka pasur progres në luftimin e korrupsionit, fenomen ky për të cilin kryeministri thotë të jetë veç perceptim, u bë e ditur se djemtë e Isa Mustafës sërish ishin përshirë në një aferë korruptive me institucione shtetërore – kësaj here me Agjencinë e Kosovës për Inteligjencë.

Mustafa ishte zotuar se djemtë e tij, Besniku e Arbeni, nuk do të fitonin tenderë nga Qeveria, por ky zotim doli ë jetë i rremë. AKI ia ka dhënë tenderin për riparimin e veturës së blinduar BMW X5 kompanisë në pronësi të djemve të Mustafës. Bëhet fjalë për të njëjtën veturë që i ishte dhënë në tender po të njëjtës kompani nga Zyra e Kryeministrit, e që më vonë i ishte dhënë në shfrytëzim AKI’së.

Insajderi.com ka raportuar për dyshimet se tenderi për kompaninë e djemve të kryeministrit ishte kurdisur porse tash, për defektin e njëjtë, të veturës së njëjtë, me çmim katërfish më të lartë. Mustafa ka qenë në dijeni për rastin, ashtu si dhe udhëheqësit e AKI’së, inspektori i përgjithshëm i së cilës në vend se të parandalojë tenderin me shkelje ligjore, kishte bërë presion në Zyrën e Prokurimit që tenderi t’iu jepej Vëllezërve Mustafa, në mënyrë që “t’i ndreqte raportet me kryeministrin”.

Raporti i fundit i Transparency International, që e rendit Kosovën si vendin më të korruptuar në rajon, kritikon institucionet se nuk kanë bërë sa duhet për të luftuar këtë dukuri. Por, një ndër këshilltarët e kryeministrit është shprehur i befasuar me këtë vlerësim pasi që, sipas tij, viti 2015 ka qenë vit pa asnjë aferë korruptive. Pikërisht në korrik të atij viti, Zyra e Kryeministrit ia kishte dhënë tenderin e shumëpërfolur djemve të tij.

Muaj më vonë, Isa Mustafa kishe bërë thirrje që ta lajmërojnë kur dikush e shfrytëzon emrin e tij për përfitime të çfarëdoshme. “Me gojën plot korrupsion ne po e dëmtojmë imazhin tonë dhe po i frikësojmë investitorët. Korrupsionin do ta mundim nëse e luftojmë bashkë. Do ta mundim nëse e lajmërojmë. Lajmëromëni edhe mua, nëse dikush thirret në emrin tim për të fituar materialisht, qoftë si kryeministër, qoftë si kryetar i LDK’së”, kishte thënë Mustafa. Duket se këtë thirrje nuk e kishin dëgjuar djemtë e tij.

* * *

Fjala “korrupsion” përmendet 83 herë në raportin e vjetmë të BE’së për Kosovën. Kur kryeministri po deklaronte se korrupsioni është më tepër perceptim sesa realitet, diplomatë europianë po kërkonin diçka tjetër nga ai. Ambasadori amerikan donte dënimin e zyrtarëve të korruptuar, derisa ai britanik po thoshte se korrupsioni nuk mposhtet me tryeza e takime, por me veprime konkrete. Të tilla veprime del të mos jenë ndërmarrë sa duhet, përndryshe vendi do t’i kishte punët shumë më mirë.

Imazhi i Kosovës nuk dëmtohet duke e përmendur korrupsionin e aferat korruptive, siç pretendon kryeministri, por duke mos e ushqyer dhe duke e luftuar atë. Edhe investitorët frikësohen jo nga ata që e përmendin, por nga ata që e kultivojnë korrupsionin. Janë përpjekje të dështuara ato të kryeministrit dhe të zyrtarëve të tjerë të Qeverisë, që ta paraqesin vendin që e udhëheqin ashtu çfarë nuk është. Kosova është e korruptuar dhe përgjegjësit dihen. Një ndër ta, mbase më përgjegjësi, është Hashim Thaçi. Pak muaj pasi kishte marrë postin e të parit të vendit, a kishte deklaruar: “Është evidentuar lufta që duhet të vazhdojë kundër korrupsionit, krimit të organizuar dhe fenomeneve të tjera negative. Kam besim të fuqishëm se kjo betejë do të jetë e fuqishme, do të fitohet”.

Këto fjalë po i thoshte njeriu, qeverisja e të cilit ishte karakterizuar me afera korruptive e krim të organizuar. Madje, vetë Thaçi ishte zgjedhur president pas tregtisë me poste publike e terminale doganore në këmbim të votave për të. Kur flitet për terminalet nuk duhet të harrohet se ishte ndërruar edhe rregullativa ligjore për t’ua përshtatur dhënien e tyre familjes së një deputeteje dhe djemve të kryeministrit. Shteti në shërbim të individëve.

* * *

Të mërkurën, Isa Mustafa ka përsëritur se gjatë mandatit të qeverisjes së tij, nuk ka ndodhur asnjë aferë korruptive. Me siguri aferat në të cilat janë përfshirë djemtë e tij nuk kanë ndodhur realisht, por janë vetëm perceptim. Ashtu siç mund të jetë perceptim çështja e terminaleve.

Isa Mustafa nuk është i zoti ta luftojë korrupsionin, siç nuk është i tillë t’i zgjidhë ose t’u jep përgjigje shumë problemeve të tjera, me të cilat po përballet vendi – që nga papunësia, varëfëria e zhvillimi ekonomik, deri te liberalizimi i vizave, demarkacioni me Malin e Zi, Asociacioni…, veriu i qeverisur nga Serbia e muri në Mitrovicë.

Përderisa qytetartët po jetojnë në ankth e pasiguri, kryeministri nuk ka përgjigje për asgjë. Për të nuk ndodh asgjë. Gjithçka është veç një perceptim.