Vokrri s’iu trembet kërcënimeve të Serbisë

Nënkryetari i Federatës së Futbollit të Serbisë, Ivan Qurkoviq, ka deklaruar që Serbia po bënë gati ankesën tjetër zyrtare kundër Kosovës. Fadil Vokrri s’trembet dhe siguron që përgjigja e FIFA-s do të jetë përsëri e njëjtë.

Federata e Futbollit të Kosovës sikur është e përgatitur për goditjet e shpeshta që mund t’i marrë nga fqinji i “dashur”. Në FFK janë të qetë dhe shprehen të bindur që edhe në rast të ndonjë ankese të Serbisë, përgjigja e FIFA-s do të jetë e njëjtë, domethënë pozitive për Kosovën.

Në një prononcim për gazetën Arena, kryetari i FFK-së, Fadil Vokrri, thotë që s’do t’ia dijë nëse Serbia ndërmerr diçka, pasi që sipas tij, ata do ta ‘hanë’ gjellën e njëjtë.

“Ne nuk jemi të informuar për asgjë dhe nuk kemi se për çfarë të informohemi nga Federata e Futbollit të Serbisë. Ata mund të ankohen përsëri, por përgjigja nga FIFA do të mbetet e njëjtë, ashtu siç ka qenë”, deklaroi numri një i futbollit kosovar.

‘Insideëorldfootball’ në rrjetin ‘online’ ka raportuar për takime të fshehta të Federatës së Futbollit të Kosovës me FIFA-n, që sipas tyre kanë ndodhur gjatë muajit shkurt. Por një gjë të tillë e kundërshton kategorikisht Vokrri, i cili thotë që FFK-ja kurrë nuk mbanë sekrete.

“Federata e Futbollit të Kosovës nuk është takuar apo nuk ka zhvilluar asnjëherë bisedime të fshehta me FIFA-n. Këto gjëra janë të pavërteta. Ne jemi transparent dhe nuk mbajmë sekrete”, u shpreh Vokrri.

Përkundër insistimit të serbëve për ndeshjen e Kosovës ndaj Haitit, miqësorja historike e përfaqësueses sonë ka marrë notë të lartë nga FIFA dhe shumë media evropiane e botërore. /Arena/