Bokson në Kosovë

Haxhi Krasniqi nuk e harron kurrë prejardhjen e tij. Boksieri kosovar, sa herë ka kohë e viziton vendlindjen, ku ndihet për mrekulli. Junikasi po qëndron këto ditë në vendlindje, pas suksesit të fundit që e arriti, duke e nokautuar ganezin Emmanuel Danso.

Aq shumë është i lidhur për Kosovën, sa që do të ishte i gatshëm të boksojë në vendin tonë. Mirëpo, 27 vjeçari thotë se, për t’u realizuar një meç i tillë, duhet punë e madhe dhe krijim i kushteve të nevojshme.

“Gjithçka është e mundshme, nuk e përjashtoj mundësinë që në të ardhmen të boksoj edhe në Kosovë. Por, shteti duhet të punojë shumë në këtë drejtim, dhe ta kuptojë se duhen krijuar kushte për ta zhvilluar një meç të tillë”, deklaroi fillimisht Krasniqi për “Zëri”.