Prorektori i ri ia kishte miratuar vëllait gradën e rrejshme akademike

Prishtinë – I sapozgjedhuri të premten në postin e ushtruesit të detyrës së prorektorit për çështje akademike në universitetin “Hasan Prishtina”, Qerim Qerimi, e kishte nënshkruar evidencën e stafit të angazhuar si ligjërues në universitetin “Kadri Zeka” në Gjilan, në të cilën vëllait të tij, Qenan Qerimi, i figuron thirrja akademike “profesor-asistent”, pa e pasur fare atë dhe as kontratë të rregullt me UP-në, shkruan sot “Koha Ditore.

Evidenca është nënshkruar edhe nga dekani i Juridikut, Bajram Uka.

Qenan Qerimi ka punuar për katër muaj si profesor-asistent në universitetin “Kadri Zeka” në Gjilan, pa pasur gradë akademike dhe pa pasur kontratë të rregullt pune në Fakultetin Juridik të universitetit “Hasan Prishtina”.

Ky angazhim i tij dhe grada profesor- asistent është bërë me dijeninë dhe me nënshkrimin e vëllait të tij, Qerim Qerimi, i cili të premten u zgjodh ushtrues detyre i prorektorit për çështje akademike në UP.

Ai ka qenë deri në këtë ditë prodekan për çështje mësimore në Fakultetin Juridik.