Ymeri në SHBA thotë se Republika u dëmtua nga negociatat me Serbinë
RajoniPress
16:00, 11 Korrik, 2015
Në vazhdën e takimeve me përfaqësuesit e legjislativit në ShBA, delegacioni i Lëvizjes Vetëvendosje, i përbërë nga kryetari Visar Ymeri dhe anëtari i Këshillit të Përgjithshëm, Florin Krasniqi, është pritur nga kongresisti Reid Ribble, anëtar i Komitetit për Marrëdhënie me Jashtë, si dhe kongresisti tjetër Jim McGovern, Bashkëdrejtues i Komitetit për të Drejtat e Njeriut dhe anëtar i Grupit të Çështjeve Shqiptare (“Albanian Caucus”) në Kongresin e SHBA-së.
Ymeri dhe Krasniqi po ashtu u pritën në zyrën e kongresistit Paul Cook, që shërben në Komitetin për Marrëdhënie me Jashtë dhe në atë të Forcave të Armatosura në Kongresin e ShBA-ve.
Gjatë këtyre takimeve u diskutuan zhvillimet e fundit politike dhe ekonomike në vend.
“Delegacioni i Lëvizjes Vetëvendosje e vuri theksin te rëndësia e sovranizimit të Republikës së Kosovës në rrafshin politik, ekonomik dhe në gjyqësor, të gjitha këto të dëmtuara nga negociatat me Serbinë, tentim-themelimi i Gjykatës Speciale, dhe keqtrajtimi dhe uzurpimi i vazhdueshëm i burimeve ekonomike të Kosovës për interesa të veçanta”, thuhet në njoftimin për media të Vetëvendosjes, raporton Koha.net.
Po ashtu, në komunikatë theksohet se Ymeri i shtjelloi qëndrimet e Vetëvendosjes karshi procesit shtetndërtues në Kosovë, duke u përqendruar në domosdoshmërinë e ndërtimit të Republikës së barazisë për qytetarët, moslejimin e formalizimit dhe zgjerimit të ndikimit të Serbisë në Kosovë përmes krijimit të “Zajednicës”, funksionalizimin dhe çlirimin nga kapja e sistemit të gjyqësorit për të garantuar barazi para ligjit për të gjithë qytetarët, dhe vendosjen e burimeve minerare dhe strategjike të Kosovës në funksion të mirëqenies së qytetarëve.
Delegacioni i Vetëvendosjes po ashtu kërkoi nga kongresistët që ta mbikëqyrin punën e Departamentit të Shtetit në Kosovë që të sigurohen që Republika e Kosovës me sovranitet të plotë, e njohur nga ShBA-të, të jetë baza e partneritetit mes ShBA-ve dhe Republikës së Kosovës.
http://koha.net/?id=27&l=65982
