Opozitarët nuk e votojnë Specialen, të pavarurit pa vendim

Deputetët opozitarë të Kuvendit të Kosovës, ende i qëndrojnë prapa deklaratave të tyre kundër votimit të themelimit të Gjykatës Speciale.Përkundër deklaratave të ministrit të Punëve të Jashtme të Gjermanisë, Frank-Walter Steinmeier që i bëri gjatë një vizite në Kosovë, se themelimi i Gjykatës Speciale është në të mirë të vendit dhe nuk e vë në dyshim luftën e UÇK-së, opozitarët nuk duan ta dëgjojnë fjalën e tij.

Donika Kadaj-Bujupi, shefe e Grupit Parlamentar të Aleancës për Ardhmërinë e Kosovës, ka thënë për Indeksonline se AAK-ja nuk do ta votojë Gjykatën Speciale, sepse kjo e sfidon sovranitetin dhe sistemin e drejtësisë në Kosovë.

“Kosova është shtet sovran dhe i pavarur dhe interesat e vendit tonë duhet të mbrohen përmes përfaqësuesve legjitim të qytetarëve dhe deputetëve dhe të zbatohen nga të zgjedhurit e popullit, do të thotë Qeveria. Është jashtëzakonisht e dhimbshme që të sfidohet edhe më tutje sovraniteti i vendit tonë parmes instalimit të një sistemi krejt paralel të drejtësisë përderisa drejtësia jonë është në një sfidë dhe përderisa sundimi i ligjit në vendin tonë është në shkallën më të ulët”, ka thënë ajo.
Për votimin e Gjykatës Speciale nuk dinë nëse do të votojnë kundër apo pro as deputetët e pavarur të Kuvendit të Kosovës.

Gëzim Kelmendi, i kontaktuar nga Indeksonline ka thënë se ende nuk ka ndonjë qëndrim lidhur me votimin e kësaj gjykate.
“Nuk kam vendosur ende. Po presim që të vijnë amendamentet, andaj nuk kam vendosur ende. Po presim ndonjë sqarim shtesë, e kur t’i kemi këto besoj se do të japim qëndrim”, ka thënë ai.

Të njëjtën përgjigje e ka dhënë edhe Shaip Muja, i cili është shprehur se kur ta marrin materialin do të vendos se a do të votojë pro themelimit të Gjykatës Speciale, apo kundër. /Indeksonline/